ტერორისტული აქტის მომზადების და სახელმწიფო ხელისუფლების დასამხობად შეთქმულების საქმეზე სუს-ში კიდევ ერთი პირი, რუმან ავლარიგოვი მივიდა.

ის მიმდინარე გამოძიების ფარგლებში გამოძიების კითხვებს მოწმის სახით უპასუხებს.

სუს-ში შესვლამდე აღნიშნულ საქმესთან დაკავშირებით მან მედიის კითხვებს ასე უპასუხა:

„რუსული არ ვიცი, ქართული არ ვიცი. ადვოკატი არა [არ მყავს]“, - განაცხადა რუმან ავლარიგოვმა.

მანამდე კი, დღეს, სუს-ში ტერორისტული აქტის მომზადების და სახელმწიფო ხელისუფლების დასამხობად შეთქმულების საქმეზე გამოიკითხა შამსუდინ ავლარიგოვი, რომელმაც უწყებაში არც შესვლის და არც გამოსვლის დროს მედიასთან კომენტარი არ გააკეთა.

აღნიშნულ საქმეზე, პარალელურად საქალაქო სასამართლოში იკითხებიან გიორგი ადამია და კარლო მუხაური.

ცნობისთვის, სუს-ის ინფორმაციით, სახელმწიფო უსაფრთხოების სამსახური იძიებს უკრაინაში მყოფი, საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებით და დაფინანსებით, საქართველოში დანაშაულებრივი ქმედებების, მათ შორის, პარტია „ქართული ოცნების“ საპატიო თავმჯდომარის, ბიძინა ივანიშვილისმკვლელობის მომზადების ფაქტებს.

"ხსენებული დანაშაულებრივი ქმედებების მიზანია, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობა.

სისხლის სამართლის საქმეზე მიმდინარეობს აქტიური საგამოძიებო და ოპერატიულ-სამძებრო ღონისძიებები, რომლის ფარგლებში ხდება კონკრეტულ პირთა საგამოძიებო ორგანოში დაბარება მათი მოწმის სახით გამოკითხვის მიზნით", - ნათქვამია სუს-ის მიერ გავრცელებულ ინფორმაციაში.