ეკონომიკისა და მდგრადი განვითარების მინისტრის მოადგილის მარიამ ქვრივიშვილის განცხადებით,საქართველოს საერთაშორისო აეროპორტებში მგზავრთნაკადი მნიშვნელოვნად გაიზარდა.

ქვრივიშვილის თქმით, თბილისის აეროპორტი ივლისში 519,275 მგზავრს მოემსახურა.

„რაც გასული წლის ამავე პერიოდის მონაცემებთან შედარებით 29%-ით მეტია, ხოლო ბათუმის აეროპორტმა წინა წელთან შედარებით 48%-ით მეტი მგზავრი გადაიყვანა.

ისტორიული მაქსიმუმია ქუთაისის საერთაშორისო აეროპორტშიც, სადაც 2024 წლის 7 თვეში მილიონამდე მგზავრს მოემსახურნენ. ეკონომიკისა და მდგრადი განვითარების მინისტრის მოადგილის მარიამ ქვრივიშვილის განცხადებით, გაიზარდა როგორც სიხშირეები, ისე მიმართულებები ევროპისა და ყურის ქვეყნებიდან, რაც, საბოლოო ჯამში, ქვეყნის საერთაშორისო აეროპორტებში მგზავრთნაკადის რეკორდულ ზრდაზე აისახა“,- განაცხადა ქვრივიშვილმა.

მინისტრის მოადგილის ინფორმაციით, ქუთაისის საერთაშორისო აეროპორტში ყველაზე მეტი ფრენების ოპერირება ევროპის მიმართულებით ხდება.

„ქუთაისში 30-მდე ევროპული მიმართულება გვაქვს, რაც დადებითად აისახება ჩვენი ქვეყნის ტურიზმის ინდუსტრიის დივერსიფიკაციაზე და ზრდის ევროპელი ტურისტების წილს ჩვენი ქვეყნის ტურიზმის სექტორში. ჩვენ ვაგრძელებთ ყველა აქტივობის განხორციელებას კერძო სექტორთან ერთად, რაც უზრუნველვყოთ ჩვენი ტურიზმისა და ავიაციის ინდუსტრიების მდგრადობა", - აღნიშნა მინისტრის მოადგილემ.

მისი თქმით, ქართული მხარე მოლაპარაკებებს აწარმოებს პარტნიორ ავიაკომპანიებთან იმისთვის, რომ საქართველოს ავიაბაზარზე შემოიყვანოს ახალი ავიაკომპანიები, გაიზარდოს ფრენის სიხშირეები იმ მიმართულებებზე, რომლებიც გამოირჩევა სტრატეგიულობით.

მარიამ ქვრივიშვილმა დაასახელა ავსტრიის ავიახაზები, რომლებიც ფრენებს ასრულებენ ვენა - თბილისის მიმართულებით, ასევე ავიაკომპანია „ტრანსავია", რომელიც ასრულებს რეისებს ამსტერდამსა და თბილისს შორის.

ამასთან, მინისტრის მოადგილემ დადებითად შეაფასა ზაფხულის ტურიზმის სექტორი საქართველოში და მას წარმატებული უწოდა.

მისი თქმით, ქვეყანამ შემოსავლის სახით ტურიზმიდან ისტორიული მაქსიმუმი მიიღო, რაც 2024 წლის ორი კვარტლის მონაცემებით 1,9 მლრდ ამერიკულ დოლარს გაუტოლდა.

„ეს მაჩვენებლები პირდაპირაა დაკავშირებული სამიზნე ბაზრების დივერსიფიკაციის პოლიტიკასთან, რასაც საქართველოს მთავრობა აწარმოებს როგორც ტურიზმის, ისე სამოქალაქო ავიაციის სექტორებში. ჩვენ აქტიურ მარკეტინგულ კამპანიებს ვაწარმოებთ საერთაშორისო არეალზე ჩვენი ქვეყნის ცნობადობის გასაზრდელად",-აღნიშნა მინისტრის მოადგილემ.

ინფორმაციას ამის შესახებ ეკონომიკისა და მდგრადი განვითარების სამინისტრო ავრცელებს.