„ევოლუშენ ჯორჯიას“ თანამშრომლების პროტესტი გრძელდება. გაფიცულმა თანამშრომლებმა ხელისუფლებას პროცესში ჩარევისა და პოზიციის დაფიქსირებისკენ მოუწოდეს.

მათი თქმით, თუ ხელისუფლება 20:00 საათამდე განცხადებას არ გაავრცელებს, ისინი იძულებულები იქნებიან თორნიკე ერისთავის ქუჩა გადაკეტონ, რათა მათივე თქმით, მოშიმშილეთა ჯანმრთელობა და სიცოცხლე დაიცვან.

„დღეს გაფიცვის 39-ე დღეა და ამ დროის განმავლობაში არც ხელისუფლებას და არც პრეზიდენტს არ გაუკეთებია განცხადება და არც სახალხო დამცველი მოსულა ადგილზე. მომავალში განვითარებულ პროცესებზე პასუხისმგებლობას ხელისუფლებასა და ამ კომპანიას ვანიჭებთ. მე-7 დღეა ადამიანები შიმშილობენ და არ დავუშვებთ მათ სიცოცხლესა და ჯანმრთელობას საფრთხე შეექმნას. ჩვენ ხელისუფლებას მოვუწოდებთ, რომ 20:00-მდე გააკეთოს განცხადება. ასევე მოვუწოდებთ საზოგადოებას, ამ ქვეყანაში შრომითი უფლებების დაცვის მიზნით, მოვიდნენ და სოლიდარობა გამოუცხადონ ადამიანებს, რომლებიც დასაქმებულები არიან ამ კომპანიაში. წინააღმდეგ შემთხვევაში, იძულებულები ვართ, რომ ჩვენს წინ არსებული გზა გადავკეტოთ.

კომპანიები რომ დაბალი შრომის სტანდარტებს აწესებენ, იმიტომ არის ემიგრაცია გაზრდილი. ეს პროცესი სრულ გამარჯვებამდე გაგრძელდება. ჩვენ ხელისუფლებას ვთხოვთ დაიჭიროს პოზიცია განვითარებულ მოვლენებთან დაკავშირებით. მოვუწოდებთ, გაატაროს ზომები, ხარბი დამსაქმებლების წინააღმდეგ, რათა დათმობაზე წამოვიდნენ“, - განაცხადა დასაქმებულთა ინტერესების დამცველი ორგანიზაციის, „Labor“-ის თავმჯდომარემ, გიორგი დიასამიძემ.

გაფიცული თანამშრომლები, კომპანიის ადმინისტრაციის შენობის შესასვლელთან არიან მობილიზებულები და სხვა თანამშრომლებს შენობაში შესვლის საშუალებას არ აძლევენ.

ასევე, „ევოლუშენ ჯორჯიას“ გაფიცული 4 თანამშრომელი კვლავ შიმშილობას აგრძელებს. მათ პროტესტის უკიდურეს ფორმას 12 აგვისტოდან მიმართეს.