„ერთიანი ნაციონალური მოძრაობის“ თავმჯდომარის, თინა ბოკუჩავას განცხადებით, დღეს, საკონსტიტუციო სასამართლოს აქვს ისტორიული შანსი, „უცხოური გავლენის გამჭვირვალობის შესახებ“ კანონის მოქმედება შეაჩეროს, რომელიც საქართველოს აზიანებს და კონსტიტუციას ეწინააღმდეგება.

მისივე თქმით, საქართველოს საკონსტიტუციო სასამართლოს აქვს შესაძლებლობა, ისტორიულ გზაგასაყარზე ქართველი ხალხის მხარეს დადგეს.

„გაზაფხულზე მთელმა მსოფლიომ ნახა, განსაკუთრებით ქართველი ახალგაზრდების დამსახურებით, რომ საქართველო ევროპას ირჩევს. ასევე, მთელმა მსოფლიომ გაიგო, რომ ქართველი ახალგაზრდების და საქართველოს მოქალაქეთა აბსოლუტური უმრავლესობის არჩევანი არის ევროპა. უპრეცედენტოდ ფართომასშტაბიანი აქციებით ქართველმა ხალხმა უთხარა „არა რუსულ კანონს, კი ევროპას“. მიუხედავად ამისა, ბიძინა ივანიშვილმა „რუსული კანონი“ მიიღო და მის ამოქმედებას აპირებს. დღეს საკონსტიტუციო სასამართლოს ისტორიული შანსი აქვს, რომ აღნიშნული კანონის მოქმედება შეაჩეროს, რომელიც ჩვენს ქვეყანას აზიანებს, რომელიც ასევე, საქართველოს კონსტიტუციას ეწინააღმდეგება. დღეს, საქართველოს საკონსტიტუციო სასამართლოს და მის თითოეულ მოსამართლეს აქვს შესაძლებლობა, რომ ამ ისტორიულ გზაგასაყარზე დადგეს ქართველი ხალხის მხარეს - ისტორიის ნათელ მხარეს. ამასთან, დაიცვას საქართველოს კონსტიტუცია, ქართველი ხალხის ინტერესი და ჩვენი ქვეყნის ევროპული არჩევანი. ეს არჩევანი ქართველ ხალხს უკვე გაკეთებული აქვს, რომ მათ სურთ ევროპული კეთილდღეობა და უარს ეუბნებიან სიღატაკეს იზოლაციაში, რადგან სწორედ იზოლაცია ჩვენს ქვეყანას „რუსული კანონის“ ამოქმედების შემთხვევაში ემუქრება, რომელიც კრემლის ანალოგია და ამაზე მთელი მსოფლიო საუბრობს. ამის გამო საქართველოს მოქალაქეებმა უკვე დაკარგეს ათეულობით მილიონი დოლარის, თუ ევროს დაფინანსება და სამწუხაროდ, საერთაშორისო იზოლაციაში ჩვენი ქვეყნის ეკონომიკური მდგომარეობა კიდევ უფრო დამძიმდება. ამიტომ, არჩევანი არის ძალიან ნათელი - ევროპული კეთილდღეობა ან სიღატაკე იზოლაციაში და ამ არჩევანში დღეს უდიდესი წვლილი აქვს საკონსტიტუციო სასამართლოს თითოეულ მოსამართლეს“, - განაცხადა თინა ბოკუჩავამ.