რუსთავის მერი ნინო ლაცაბიძე, ნიდერლანდების სამეფოს ელჩს საქართველოში, მელინე არაკელიანს შეხვდა.

ამის შესახებ ინფორმაციას რუსთავის მუნიციპალიტეტის მერია ავრცელებს.

მათი ცნობით, რუსთავში ვიზიტით მყოფ ნიდერლანდების სამეფოს ელჩს, ქალაქის მერმა მუნიციპალური სერვისების ცენტრში უმასპინძლა. ნინო ლაცაბიძემ, მელინე არაკელიანს, რუსთავში მიმდინარე და დაგეგმილი რეფორმები, პროექტები და ქალაქის განვითარების ახალი ხედვა გააცნო.

„საინტერესო შეხვედრა გვქონდა ნიდერლანდების სამეფოს ელჩთან, ვისაუბრეთ ქალაქის განვითარებაზე და სამომავლო პერსპექტივებზე. ელჩს გავაცანით რუსთავში მიმდინარე მუნიციპალური რეფორმები, რომელიც დღეს ქალაქში მერიის გუნდის მიერ ხორციელდება”, - განაცხადა ნინო ლაცაბიძემ.

მათივე ინფორმაციით, რუსთავის მერმა, ნიდერლანდების სამეფოს ელჩს საქართველოში, ქალაქში დაგეგმილი ეკოპროექტებიც გააცნო. ნინო ლაცაბიძემ დეტალურად ისაუბრა ჭალის ტყის განვითარების გეგმაზე.

შეხვედრის დასრულების შემდეგ, ნინო ლაცაბიძემ მელინე არაკელიანს, რუსთავის ახალი მედიათეკა დაათვალიერებინა, რომელიც ბიბლიოთეკების რეფორმის შედეგად შეიქმნა.