კოალიცია "ძლიერი საქართველო" რეგიონებში შეხვედრებს განაგრძობს. ამის შესახებ ინფორმაციას კოალიციის პრესსამსახური ავრცელებს.

როგორც გავრცელებულ ინფორმაციაშია ნათქვამი, კოალიციის ერთ-ერთი ლიდერი დეა მეტრეველი, სხვა ლიდერებთან ერთად, დუშეთში ჩავიდა და ადგილობრივებს შეხვდა.

ოპოზიციის წარმომადგენლები დაინტერესდნენ, რა გამოწვევების წინაშე დგას მცხეთა-მთიანეთის რეგიონი და რა პრობლემები აქვს მოსახლეობას.

„კოალიცია "ძლიერი საქართველო" აგრძელებს მოსახლეობასთან შეხვედრებს, მიუხედავად შეშინებული ხელისუფლების ლაჩრული თავდასხმებისა. ჩვენ ვაპირებთ, მოსახლეობას ვესაუბროთ კონკრეტულ პროგრამულ ხედვებზე, თუ როგორ დავძლიოთ უმუშევრობა და შევქმნათ 200 000 სამუშაო ადგილი ღირსეული ანაზღაურებით და დაცული შრომითი პირობებით, როგორ გავხადოთ პენსია 1000 ლარი და, რაც მთავარია, როგორ გავხადოთ საქართველო სწრაფი ნაბიჯებით ევროკავშირის წევრი.

ეს სტრატეგიული მნიშვნელობის მხარე უნიკალურია თავისი ბუნებით, რესურსებით, შესაძლებლობებით. უმდიდრესია კულტურული მემკვიდრეობის ძეგლებით, რომელიც ხელისუფლების გულგრილობის გამო ინგრევა - ქართული კვალი იშლება მცხეთა-მთიანეთში! ამიტომაც, ბუნებრივია, რომ ხელისუფალი შეშინებულია. მას პირი აღარ აქვს მოსახლეობასთან გამოსაჩენად და ბრონირებული მინის ტრიბუნიდან ესაუბრება მოქალაქეებს. ამიტომაც, 26 ოქტომბერს, ისტორიულ არჩევნებზე, დარწმუნებული ვარ, რომ მცხეთა-მთიანეთის რეგიონის მოსახლეობა თავის გადამწყვეტ სიტყვას იტყვის ძლიერი, ევროკავშირის წევრი საქართველოს სასარგებლოდ!" , - განაცხადა დეა მეტრეველმა.