გახარიას გუნდზე რაიმე სერიოზულ კომენტარს ვერ გავაკეთებ, განსაკუთრებით ბოლო პერიოდში ჩვეულებრივ კარიკატურას დაემსგავსა ეს გაერთიანება - საკუთარი უფროსის კარიკატურები არიან შეკრებილები. ბოლო პერიოდში მათგან მხოლოდ „დაგიჭერ, დაგაპატიმრებ“ განცხადებები გვესმის, - ამის შესახებ საქართველოს პარლამენტის თავმჯდომარემ შალვა პაპუაშვილმა განაცხადა, რომელიც გამოეხმაურა „გახარია საქართველოსთვის“ პარტიის მოწოდებას, „დაიწყოს გამოძიება მიხეილ სააკაშვილის ციხეების ყოფილი კურატორისა და „ოცნების“ დეპუტატის გივი მიქანაძის წინააღმდეგ.“

ამასთან, როგორც პაპუაშვილმა განმარტა, გივი მიქანაძეს ციხის ბუნტის საქმესთან კავშირი არ აქვს და ის თანამდებობიდან გადადგა, როდესაც სააკაშვილის ხელისუფლებამ ხალხის მიერ მხარდაჭერილი ფასეულობებიდან გადაუხვია.

„რაც შეეხება გივი მიქანაძეს, როდესაც მიხეილ სააკაშვილის ხელისუფლებამ გადაუხვია იმ ფასეულობებს, რომლებსაც თავიდანვე ხალხის მხარდაჭერა ჰქონდა, ის გადადგა თანამდებობიდან, წასული იყო საზღვარგარეთ და მუშაობდა საზღვარგარეთ.

არანაირი კავშირი ამ საკითხთან არ აქვს, ეს უბრალოდ კიდევ ერთხელ აჩვენებს თავად გიორგი გახარიას მეწვრილმანეობას, როდესაც ცდილობენ არარსებული თემიდან მას პრეტენზიები წაუყენონ, უბრალოდ იმიტომ, რომ გივი მიქანაძე აქტიურად ამხელს მათ გუნდს საარჩევნო დარღვევებში, რაც არის აბსოლუტური სისულელე. გახარიას გუნდი რომ არის სისულელის გამავრცელებელი, მე მგონი, ყველა ხედავს. აბსოლუტური სპეკულაცია, სერიოზული კომენტარის ღირსიც არ არის ეს საკითხი”, - განაცხადა პაპუაშვილმა.

ცნობისთვის, პარტია „გახარია საქართველოსთვის“ ინფორმაციით, 2006 წელს მომხდარი “ციხის ბუნტისას“, რა დროსაც დაიღუპა 7 და დაშავდა 22 პატიმარი, გივი მიქანაძე იუსტიციის მინისტრის მოადგილის პოსტს იკავებდა, უშუალოდ მის საკურატორო სფეროს კი, სასჯელაღსრულების სისტემა წარმოადგენდა.