ავსტრიის საპარლამენტო არჩევნებში მემარჯვენე პოპულისტური “ავსტრიის თავისუფლების პარტია“ იმარჯვებს, რომელსაც ჰერბერტ კიკლი ხელმძღვანელობს, - ინფორმაციას “დოიჩე ველე“ ავრცელებს.

გამოცემის ცნობით, ავსტრიის შინაგან საქმეთა სამინისტროს მიერ გამოქვეყნებული წინასწარი ოფიციალური შედეგების მიხედვით, პარტიამ არჩევნებში ხმების 29.2 %-ი მოიპოვა.

მეორე ადგილზეა მმართველი კონსერვატიული „ავსტრიის სახალხო პარტია“, რომელსაც კანცლერი კარლ ნეჰამერი ხელმძღვანელობს და რომელმაც არჩევნებში ხმების 26.5%-ი მიიღო. ავსტრიის სოციალ-დემოკრატიულმა პარტიამ - 21.1%-ი, პარტიამ „ახალი ავსტრია და ლიბერალური ფორუმი“ – 9%-ი, მწვანეებმა კი - 8%-ი.

მცირე პარტიებმა, როგორიცაა „ავსტრიის კომუნისტური პარტია“ და „ლუდის პარტია“, ავსტრიის პარლამენტში წარმომადგენლობის მოსაპოვებლად საჭირო ხმების 4%-ზე მნიშვნელოვნად ნაკლები მიიღეს.

ხმების დათვლისას გათვალისწინებული იქნა ფოსტით გაგზავნილი ბიულეტენების უმრავლესობა. დარჩენილი ხმების დათვლა, სავარაუდოდ, 3 ოქტომბრამდე მოხდება.

შეგახსენებთ, ავსტრიაში საპარლამენტო არჩევნები გუშინ ჩატარდა. ამომრჩეველთა აქტივობამ 78%-ი შეადგინა.