თავისუფლებამ და ღირსებამ გაიმარჯვა საქართველოში და ყველას გილოცავთ! - მივმართავ „ქართულ ოცნებას“ - შეეგუეთ მარცხს, ამას მეტი კაცობა სჭირდება - გეყოთ, რაც აჯანჯღარეთ ჩვენი ქვეყანა,- ამის შესახებ კოალიცია „ძლიერი საქართველოს“ ერთ-ერთმა ლიდერმა, ალეკო ელისაშვილმა განაცხადა.

ელისაშვილმა „ქართულ ოცნებას“ ხელისუფლების ოპოზიციისთვის მშვიდობიანად გადმობარებისკენ მოუწოდა.

„თავისუფლებამ და ღირსებამ გაიმარჯვა საქართველოში და ყველას გილოცავთ! ყველას, ვინც არ გატყდით, ვინც მიხედვით, გააფერადეთ ოპოზიცია და განსაკუთრებით 9 ნომერი. მადლობა ყველას! ყველაფერი ამით არ დამთავრებულა. ყველა ხმას დავიცავთ და ამ გამარჯვებას ოფიციალურად ბეჭედს დავარტყამთ. ცესკო-ს ბეჭდის დარტყმა მოუწევს. მინდა მივმართო „ქართულ ოცნებას“, ვისაც გონიერება შერჩენია - მოეშვით მაიმუნობას, გეყოთ დღეს რასაც მამაძაღლობდით მთელი დღის განმავლობაში, ხალხს უქსევდით ვიღაც ქეციან ზონდერებს, ვიღაც ძალით ძველ ბიჭებს. გეყოფათ ახლა ეს! ხელისუფლება წყნარად გადმოგვაბარეთ. ამაღამ უკვე დავიწყებთ იმ დაპირებების შესრულებას, რასაც ხალხს ვპირდებოდით: ევროკავშირისკენ სვლა და ჩვენი გამდიდრება, ორასი ათასი სამუშაო ადგილი, ანაკლიის პროექტის დაუყოვნებლივ შესრულება და 1000-ლარიანი პენსია. ამისთვის ხელები გვაქვს დაკაპიწებული.

ქართველებო, ღირსეულო ქართველებო, გილოცავთ ყველას! „ქართულ ოცნებაში“ კიდევ ერთხელ გეუბნებით, შეეგუეთ მარცხს. ამას მეტი კაცობა სჭირდება. მოძებნეთ თქვენს თავში ძალა. გეყოთ რაც აჯანჯღარეთ ჩვენი ქვეყანა“, - განაცხადა ალეკო ელისაშვილმა.

ცნობისთვის, Edison Research-ის ეგზიტპოლის შედეგების თანახმად, „ქართულმა ოცნებამ“ ხმების 40,9 % მიიღო, „ერთიანობა - ნაცმოძრაობამ“ 16,7 %, მელია-გვარამიას კოალიციამ 16,7 %, „ძლიერმა საქართველომ“ – 10,3% და გახარიას პარტიამ - 8,2 %.