აეროპორტების მიმართულებით ძალიან ამბიციური გეგმები გვაქვს. თბილისის საერთაშორისო აეროპორტი, ვაზიანის ახალი აეროპორტი... ასევე ქუთაისის აეროპორტის გაფართოება, - ამის შესახებ პრემიერ-მინისტრმა ირაკლი კობახიძემ მთავრობის სხდომაზე განაცხადა.

ამასთან, პრემიერი იმედოვნებს, რომ 2028 წელს მიიღებს ანაკლიის პორტი პირველ გემს.

„ინფრასტრუქტურული სამუშაოები გაგრძელდება. ძალიან კონკრეტული და მკაფიო გეგმა გვაქვს შემდეგი 4 წლისთვის. ეს გეგმა სრულად უნდა განხორციელდეს, მათ შორის საგზაო პროექტები, მრავალი მიმართულებით გვაქვს პროექტები.

ძალიან მნიშვნელოვანი პროექტია დაანონსებული - საუნივერსიტეტო კამპუსების განვითარების პროექტი როგორც თბილისში, ისე ქუთაისში. საუბარია, სრულიად ახალი ინფრასტრუქტურის შექმნაზე, რაც ჩვენს სტუდენტებს მისცეს საშუალებას, რომ საქართველოში მიიღონ უმაღლესი ხარისხის განათლება, უმაღლესი დონის ინფრასტრუქტურის პირობებში, შესაბამის გარემოში. ეს მისცემს მათ საკუთარი ინტერესების სხვაგვარად რეალიზების საშუალებას, მთელი ყურადღება დაეთმობა ამ მნიშვნელოვანი პროექტის განხორციელებას, რომელიც უნდა დასრულდეს 2028 წელს.

აეროპორტების მიმართულებით ძალიან ამბიციური გეგმები გვაქვს. თბილისის საერთაშორისო აეროპორტი, ვაზიანის ახალი აეროპორტი...ასევე ქუთაისის აეროპორტის გაფართოება. ანაკლიის პორტის პროექტი, რომლის მშენებლობა დაწყებულია და გვექნება შედეგები მაქსიმუმ 2029 წლისთვის, იმედია 1 წლით ადრე მოხდება პირველი გემების მიღება ანაკლიაში. გვაქვს ახალი სტადიონის პროექტი, ჯარზე და პოლიციაზე ზრუნვა გაგრძელდება მუდმივ რეჟიმში. ქართული ჯარი და სამართალდამცავი უწყებები არის ჩვენი სახელმწიფოებრიობის უმთავრესი საყრდენი. ჩვენი ვალია განსაკუთრებული ზრუნვა ჯარის და პოლიციის განვითარებაზე.

გაგრძელდება ზრუნვა სამართალდამცავი სტრუქტურების, თითოეული ჯარისკაცის, პოლიციელის, უსაფრთხოების სამსახურის წარმომადგენლის, სახელმწიფო დაცვის, დაზვერვის სამსახურის წარმომადგენლის ინტერესების რეალიზებაზე“,- აღნიშნა კობახიძემ.