მამუკა მდინარაძე - „სამართლიანი არჩევნების“ ხელმძღვანელზე, ნინო დოლიძეზე მიმდინარეობს „ბულინგი“ და მას უკრძალავენ, პარალელური ხმის დათვლის მონაცემები გამოაქვეყნოს
ISFED-ის ხელმძღვანელზე, ნინო დოლიძეზე მიმდინარეობს ბულინგი და მას უკრძალავენ, გამოაქვეყნოს პარალელური ხმის დათვლის მონაცემები, - ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ ბრიფინგზე განაცხადა.
მისი თქმით, ამერიკის შეერთებული შტატების ბიუჯეტიდან დაფინანსებულმა ორგანიზაციამ „კეთილი უნდა ინებოს“ და საქართველოში ჩატარებული არჩევნებიდან დღე-ნახევრის შემდეგ მაინც გამოაქვეყნოს პარალელური ხმის დათვლის მონაცემები.
„როგორც ჩვენთვის ცნობილია, შევეცდები ეს ინფორმაცია დავაზუსტოთ, თუნდაც თქვენი, ჟურნალისტების მეშვეობით და საზოგადოებას მივაწვდით ინფორმაციას, რომ „სამართლიანი არჩევნების“ ხელმძღვანელზე მიმდინარეობს ბულინგი და მას უკრძალავენ გამოაქვეყნოს პარალელური ხმის დათვლის მონაცემები. უკვე დღე-ნახევარია გასული და ე.წ. „სამართლიანია არჩევნები“ ვერ ახერხებს, რომ გამოაქვეყნოს პარალელური ხმის დათვლის მონაცემები. შეგახსენებთ, ეს არის ის ორგანიზაცია, რომელმაც შეცდომად აღიარა და ჩვენ მაშინ საზოგადოებას ვამცნეთ უმალვე, 2020 წელს რომ გაყალბებული იყო არა არჩევნები მაშინ, არამედ პარალელური ხმის დათვლის მონაცემები, ოღონდ ეს შეეხებოდა მხოლოდ 2 პროცენტს. შემდეგ ამ შეცდომის გამოსწორება მათ სცადეს შეცდომის დარქმევით, ხოლო წელს, ისინი უკვე დღე-ნახევრის განმავლობაში ვერ თუ არ აქვეყნებენ პარალელური ხმის დათვლის მონაცემებს.
ასევე შეგახსენებთ, რომ ეს არის ორგანიზაცია, რომელიც ფინანსდება USAID-ის მიერ. ანუ, პირდაპირ ამერიკის შეერთებული შტატების სახელმწიფო ბიუჯეტიდან და ჩვენ ყველანი ერთად მოვალენი ვართ, რომ გავუფრთხილდეთ იმიჯს ჩვენი მეგობარი და პარტნიორი ქვეყნის და მისმა დაფინანსებულმა ორგანიზაციამ კეთილი ინებოს და საქართველოში ჩატარებული არჩევნებიდან დღე-ნახევრის შემდეგ მაინც გამოაქვეყნოს პარალელური ხმის დათვლის მონაცემები,“ - განაცხადა მდინარაძემ.
