სალომე ზურაბიშვილი არის მართალი ქვეყნის ისტორიის და მომავლის წინაშე - მედვედევის მითითებით მისი პროკურატურაში დაბარება არის კომიკური, ბიძინა ივანიშვილის მხრიდან არის კუთხეში მომწყვდევა საკუთარი თავის, - ამის შესახებ „კოალიცია ცვლილებისთვის“ ერთ-ერთმა ლიდერმა, ელენე ხოშტარიამ ბრიფინგზე განაცხადა.

მისი თქმით, პროკურატურის მხრიდან გამოკითხვაზე დასაბარებელია ბიძინა ივანიშვილი ქვეყნის ღალატისთვის.

„ხაზგასმით გვინდა ვთქვათ, დღეს საქართველოს პრეზიდენტი სალომე ზურაბიშვილი ასრულებს ისტორიულ მისიას, საქართველოს კონსტიტუციის, სახელმწიფოებრიობის და ჩვენი ევროპული გზის დაცვის. დღეს სალომე ზურაბიშვილი არის ისეთი ძლიერი, როგორიც არასდროს. მას აქვს ხალხის მხარდაჭერა, ოპოზიციური პარტიების სრული მხარდაჭერა და უდიდესი საერთაშორისო მხარდაჭერა. რაც მთავარია, ის არის მართალი ქვეყნის ისტორიის და მომავლის წინაშე. ამიტომ მედვედევის მითითებით, ყველანაირი კომიკური დაბარება, ბიძინა ივანიშვილის მხრიდან არის კიდევ უფრო დასუსტება და კუთხეში მომწყვდევა საკუთარი თავის. პროკურატურის დასაბარებელია ბიძინა ივანიშვილი ქვეყნის ღალატისთვის. როდესაც მსოფლიოს ყველაზე მაღალი ტრიბუნებიდან, ბაიდენისგან, ევროკავშირისგან პირდაპირ გვესმის აბსოლუტურად მტკიცე პოზიცია, რომ ეს არჩევნები იყო გაყალბებული, არალეგიტიმური, ამ პირობებში ამასთან შეწინააღმდეგება არის უბრალოდ კომიკური,“ - განაცხადა ხოშტარიამ.

ცნობისთვის, პროკურატურამ საპარლამენტო არჩევნების სავარაუდო გაყალბების ფაქტზე გამოძიება დაიწყო და საქართველოს პრეზიდენტი, სალომე ზურაბიშვილი გამოკითხვაზე დაიბარა.