ამ ქვეყანაში სიძულვილის ენის ავტორია ბიძინა ივანიშვილი, რომელიც 12 წელია ამ მეთოდით მართავს ქვეყანას. მან შექმნა ამ ქვეყანაში სიძულვილის ენა, რომელიც იწყება ტროლ-ბოტებით და მთავრდება საჯარო მოხელეების იძულებით, რომ აგინონ უდანაშაულო ადამიანებს საკუთარი სამოქალაქო პოზიციის გამოხატვისთვის, - ამის შესახებ „ერთიანობა - ნაციონალური მოძრაობის” პრესსპიკერმა, ლევან სანიკიძემ განაცხადა.

მისივე თქმით, „ქართული ოცნება“ მათი ამომრჩევლების წინააღმდეგაც მიდის, რომლებიც აფიქსირებდნენ, რომ ევროკავშირში გაწევრიანება სურთ.

„ამ ყველაფრის ავტორს აქვს სახელი და გვარი და ჰქვია ბიძინა ივანიშვილი. მან შექმნა ამ ქვეყანაში სიძულვილის ენა, რომელიც იწყება ტროლ-ბოტებით და მთავრდება საჯარო მოხელეების იძულებით, რომ აგინონ უდანაშაულო ადამიანებს საკუთარი სამოქალაქო პოზიციის გამოხატვისთვის. ვინმე თუ ჰგონია, რომ რომელიმე ელჩის სამარცხვინო განცხადებაზე, გაბრაზებულ ადამიანებს, რომლებსაც წაართვეს ამ ქვეყანაში არჩევნების უფლება, ცენზურის დაცვით საკუთარი კრიტიკის გამოხატვის უფლება არ აქვთ, ბოდიში მომითხოვია. ჯერ კიდევ ამ ქვეყანაში არსებობს რაღაც, რომელიც ცდება „ქართული ოცნების“ „ხოშს“ და სურვილებს. ეს არის ის, რითაც „ქართული ოცნება“ 12 წელი მართავს ამ ქვეყანას. ჩვენ მაქსიმალურად ვეცადეთ, ვყოფილიყავით დაახლოებული, ჩვენი საზოგადოება არ ყოფილიყო დაპირისპირებული. ვხედავთ, რომ ამის მთავარი ინიციატორი არის ივანიშვილი, რომელიც უგულებელყოფს საზოგადოების უმრავლესობის ნებას, მათ შორის „ქართული ოცნების“ ამომრჩევლების უმრავლესობის ნებასაც, არჩევნებში წერს რადიკალურად განსხვავებულ შედეგს და „ქართული ოცნების“ ამომრჩევლების უმრავლესობის, რომლებიც გამოკითხვაში აფიქსირებდა, რომ მათ სურთ ევროკავშირში გაწევრიანება, ნების საწინააღმდეგოდაც მიდის“, - განაცხადა ლევან სანიკიძემ.

ლევან სანიკიძის განცხადებას პარტიის პრესსამსახური ავრცელებს.