2024 წლის 7 ნოემბერს საქართველოს სახალხო დამცველმა ლევან იოსელიანმა კახეთის რეგიონში, სოფელ საქობოსა და სოფელ გრემში მდებარე შშმ პირთა სათემო მომსახურებები მოინახულა და დაწესებულებებში მცხოვრებ პირთა უფლებრივ მდგომარეობას გაეცნო.

ამის შესახებ ინფორმაციას საქართველოს სახალხო დამცველის აპარატი ავრცელებს.

მათი ცნობით, სახალხო დამცველმა სათემო მომსახურებების ფიზიკური გარემო, ბენეფიციართა საცხოვრებელი ოთახები, სასადილო სივრცეები, სველი წერტილები, ეზო დაათვალიერა და სათემო ორგანიზაციების ადმინისტრაციას, თანამშრომლებსა და ბენეფიციარებს გაესაუბრა.

„ვიზიტისას განსაკუთრებული ყურადღება გამახვილდა ორგანიზაციებში უსაფრთხო გარემოსა და პირობებზე, სანიტარულ მდგომარეობაზე, სათანადო კვებასა და ზრუნვის ასპექტებზე, შშმ პირთა დამოუკიდებელი ცხოვრებისა და სოციალური აქტივობის ხელშემწყობის მნიშვნელობაზე.

სახალხო დამცველი განაგრძობს სახელმწიფო ზრუნვაში მყოფი შეზღუდული შესაძლებლობის მქონე პირთა უფლებების დაცვის მიზნით საქმიანობაზე, არსებულ სათემო მომსახურებებში შშმ პირთა უფლებების დაცვისა და ქვეყანაში მიმდინარე დეინსტიტუციონალიზაციის პროცესის მონიტორინგს.

სათემო ორგანიზაციებში სახალხო დამცველთან ერთად ვიზიტით იმყოფებოდნენ სახალხო დამცველის მოადგილე ირინე ჩიხლაძე და ცენტრალური აპარატისა და რეგიონული ოფისის თანამშრომლები“,- ნათქვამია ინფორმაციაში.