ძალიან მძიმეა, როდესაც ათწლეულების ნალოლიავები ურთიერთობები, განსაკუთრებით საქართველოს თავდაცვისა და უსაფრთხოების მიმართულებით, ზიანდება საქართველოს ხელისუფლების არაგონივრული და ანტისახელმწიფოებრივი პოლიტიკით, - ასე შეაფასა კოალიცია „ძლიერი საქართველოს“ წევრმა, ლანა გალდავამ გერმანიის ელჩის, პიტერ ფიშერის განცხადება, რომლის ცნობით, „საქართველოს ამჟამინდელი პოლიტიკა გერმანიისთვის შემაშფოთებელია და საქართველოში ზოგიერთი დიდი სამხედრო პროექტის გაუქმება გამოიწვია“.

ლანა გალდავას განცხადებით, ეს ქვეყნის ეროვნული ინტერესისთვის დიდი დარტყმაა.

„ცხადია, ძალიან მძიმე სიტუაციაა. ევროპარლამენტში გუშინწინდელი დებატებიც ამის მაჩვენებელია, სადაც გამოვიდა ევროკომისიის ვიცე-პრეზიდენტი, რომელმაც განაცხადა, რომ ევროინტეგრაციის პროცესი არის შეჩერებული და სანამ ხელისუფლება კურსს არ შეიცვლის, იქამდე არაფერი გაგრძელდება. ეს არის ქვეყნის ეროვნული ინტერესისთვის დიდი დარტყმა, განსაკუთრებით იმ ქვეყნისთვის, რომლის ტერიტორიების 20% არის ოკუპირებული, რომლის ტერიტორიაზე დგანან რუსული ჯარები და შესრულებული არ არის 12 აგვისტოს ცეცხლის შეწყვეტის შესახებ 6 პუნქტიანი შეთანხმება“, - განაცხადა გალდავამ.