უმრავლესობის დეპუტატის, ირაკლი ქადაგიშვილის აზრით, “ძლიერი საქართველოს“ ინიციატივა ოპოზიციის მიერ საარჩევნო სიების ერთობლივად ჩახსნის და სადეპუტატო მანდატების ერთობლივად გაუქმების შესახებ ერთმანეთის მიმართ უნდობლობას უკავშირდება.

ქადაგიშვილის თქმით, როცა მანდატების შეწყვეტის საკითხი დღის წესრიგში დადგება, პარლამენტში “შესაბამისს გადაწყვეტილებას მიიღებს და ოპოზიციის სურვილი, რომ პარლამენტი არ შედგეს, არ განხორციელდება“.

“ერთმანეთს არ ენდობიან - მათ შორის პარტიისა და კოალიციებს შიგნით მდგრადობას არ ენდობიან. ამიტომ სურთ, პირველი არც ერთი არ გადახტეს - თუ გადახტომაა, ყველა ერთად გადავხტეთო - აი, ამის შიში აქვთ!

მათ არჩევნების შედეგები არ მოეწონათ, რადგან წააგეს. ახლა ყველაფერს გააკეთებენ, რათა ქვეყანაში კონსტიტუციური წყობა ჩამოამხონ. ჩვენი პასუხი მარტივია - ყველაფერს გავაკეთებთ ისე, რომ ქვეყანაში კონსტიტუციური წყობა მყარად შენარჩუნდეს - პარლამენტიც შესაბამისს გადაწყვეტილებებს მიიღებს. თუ რა გადაწყვეტილებები იქნება, ამას გაიგებთ!“ - განაცხადა ირაკლი ქადაგიშვილმა.

ქადაგიშვილი იმასაც ამბობს, რომ არავითარი მნიშვნელობა არა აქვს აღნიშნული პარტიები პარლამენტში იქნებიან თუ არა.

“წინა მოწვევის პარლამენტში რომ იყვნენ, ერთ კანონს მაინც თუ მისცეს ხმა?! რა მნიშვნელობა აქვს პარლამენტში იქნებიან თუ არ იქნებიან და დესტრუქციას ქუჩაში მოაწყობენ თუ პარლამენტის კედლებში?!“ - განაცხადა ქადაგიშვილმა.

“ძლიერი საქართველო“ ოპოზიციურ პარტიებს სთავაზობს, მანდატების დატოვებისა და სიების ჩახსნის პროცედურული ქმედება ერთობლივად, ერთ დღესა და ერთ დროს განახორციელონ - გაერთიანება მზაობას გამოთქვამს, აქტი პრეზიდენტის ჩართულობით შესრულდეს.