ყაველაშვილს პოლიტიკური ამბიციები არ გაუჩნდება, ის იქნება მორჩილი და ყველა იმ პირობას დააკმაყოფილებს, რასაც გუნდი ეტყვის - პრეზიდენტის ინსტიტუტი საერთოდ გავაუქმეთ,- ამის შესახებ პოლიტოლოგმა ვახტანგ ძაბირაძემ „ინტერპრესნიუსთან“ განაცხადა, რითაც ის ფაქტი შეაფასა, რომ პრეზიდენტობის კანდიდატი მიხეილ ყაველაშვილი იქნება.

ძაბირაძე ფიქრობს, რომ პრეზიდენტობის კანდიდატი მორჩილების ნიშნით შეირჩა.

„რა თქმა უნდა, პრეზიდენტობის კანდიდატს არჩევდნენ ერთგულების და მორჩილების ნიშნით. ალბათ, სხვა ვერ მოძებნეს უკეთესი და ყაველაშვილი დაასახელეს. ყაველაშვილს პოლიტიკური ამბიციები არ გაუჩნდება, ის იქნება მორჩილი და ყველა იმ პირობას დააკმაყოფილებს, რასაც გუნდი ეტყვის. საკმაოდ ცნობილი და აქტიური პირია. ვინც ადევნებდა თვალს მის გამოსვლებსა და პოზიციებს, მგონი, მათთვის გასაგებია ყველაფერი. ზოგადად, ამ გადაწყვეტილებით, პრეზიდენტის ინსტიტუტი საერთოდ გავაუქმეთ. არც კი ვიცი, სხვა რა უნდა ვთქვა“, - აღნიშნა ძაბირაძემ.

ინფორმაციისთვის, საქართველოს პრეზიდენტობის კანდიდატი მიხეილ ყაველაშვილი იქნება. "ქართული ოცნების" პოლიტსაბჭოს შესაბამისი გადაწყვეტილების შესახებ განცხადება პარტიის ოფისში გამართულ ბრიფინგზე, "ქართული ოცნების" საპატიო თავმჯდომარე, ბიძინა ივანიშვილმა გააკეთა.

„29 დეკემბერს შედგება ახალი პრეზიდენტის ინაუგურაცია და ამ დღიდან წარსულს ჩაბარდება საქართველოს პრეზიდენტის მიერ ქვეყნის ღალატისა და კონსტიტუციის სისტემატური დარღვევის უხეში პრაქტიკები, რომელმაც პრეზიდენტის ინსტიტუტს უდიდესი ზიანი მიაყენა“,- აღნიშნა ივანიშვილმა.