კარგია, უნდა გაკეთდეს, ძალიან მაგარი იდეაა - იქ პრეზიდენტი იყოს სალომე ზურაბიშვილი, რომელსაც აქ 5 პარასკევი აქვს და იქ 2 პარასკევი ექნება დარჩენილი, - ამის შესახებ საპარლამენტო უმრავლესობის ლიდერმა, მამუკა მდინარაძემ ჟურნალისტებთან განაცხადა, რითაც გამოეხმაურა „ძლიერი საქართველოს“ ლიდერის, მამუკა ხაზარაძის ინიციატივას „სახალხო პარლამენტთან“ დაკავშირებით.

მისი თქმით, ის „თანაუგრძნობს იმ ამომრჩეველს, რომელმაც მსგავსი მესიჯების გამხმოვანებელ ხალხს მისცა ხმა.“

„კარგია, უნდა გაკეთდეს, ძალიან მაგარი იდეაა. შალვას ფანჩატურში აღარ შეეშვებათ, რადგან თურმე შალვა გაბრაზდა. იმ დღეს განცხადება გაუკეთებია, გვარამია რომ გაიქცა, თურმე ძალიან გაბრაზდა. რაიმე, სალომეს ფანჩატური გააკეთონ ახლა. სალომეს [ზურაბიშვილს] 4 თუ 5 პარასკევი დარჩა. ამ ხუთ პარასკევში გადაწყვიტონ და სახლობანა ითამაშონ მერე. წავიდნენ, ფანჩატური მოაწყონ, თავისი სახელმწიფო ფანჩატური დაარქვან და იძახონ, ჩვენ ჩელიაბინსკში არ გვინდა, ფანჩატურში გვირჩევნიაო. იქ პრეზიდენტი იყოს სალომე ზურაბიშვილი, რომელსაც აქ 5 პარასკევი აქვს და იქ 2 პარასკევი ექნება დარჩენილი, ამ შემთხვევაში პოლიტიკურ პარასკევს ვგულისხმობ (პოლიტიკური გახდა ეს პარასკევები) და გააგრძელონ ასე თამაში.

მართლა თანავუგრძნობ მათ ამომრჩევლებს, რომელიც აი ამ მესიჯების გამხმოვანებელ ხალხს უჭერდა მხარს“, - განაცხადა მამუკა მდინარაძემ.

ცნობისთვის, მამუკა ხაზარაძემ ახალი არჩევნების მისაღწევად 5-პუნქტიანი გეგმა გამოაქვეყნა, მათ შორის არის ოპოზიციის მხრიდან არჩეული პარლამენტის წევრების მიერ “სახალხო პარლამენტის” ფორმირება და თავმჯდომარედ პრეზიდენტის მოწვევა.