ლიეტუვის რესპუბლიკის საგარეო საქმეთა სამინისტროს დიპლომატები და თანამშრომლები ახლოდან ვადევნებთ თვალს შემაშფოთებელ მოვლენებს საქართველოში, მას შემდეგ, რაც მათ მთავრობამ ქვეყნის ევროინტეგრაციის შეჩერების შესახებ გადაწყვეტილება გამოაცხადა, - ამის შესახებ ნათქვამია ლიეტუვის საგარეო საქმეთა სამინისტროს დიპლომატებისა და თანამშრომლების განცხადებაში.

განცხადებაში ისინი სოლიდარობას უცხადებენ საქართველოს საგარეო საქმეთა სამინისტროს კოლეგა დიპლომატებსა და თანამშრომლებს, რომლებმაც „2028 წლამდე საქართველოს ევროკავშირში ინტეგრაციის შეჩერების წინააღმდეგ პეტიციას მოაწერეს ხელი“.

„მყარად გვჯერა, რომ საქართველო ევროპული სახელმწიფოა და მისი მომავალი ევროკავშირსა და ნატოშია. ქართველი ხალხის მისწრაფებების, რომელთა 80%-ზე მეტი საქართველოს ევროატლანტიკურ ინტეგრაციას უჭერს მხარს, დაღალატება არ შეიძლება.

ჩვენ მთელი გულით მივესალმებით ჩვენი ქართველი კოლეგების მამაც ქმედებას, რომ მათი ხმა გაგონილ იქნას.

გავაგრძელებთ საქართველოში ვითარებისადმი თვალის მიდევნებას, საქართველოს საგარეო საქმეთა სამინისტროში იმ კოლეგების უსაფრთხოებასა და არა-დისკრიმინაციაზე განსაკუთრებული ყურადღებით, რომლებმაც უკვე მოაწერეს ან მოაწერენ ხელს პეტიციას. დაჟინებით მოვითხოვთ, რომ ვინც მათ წინააღმდეგ ქმედებებს განახორციელებს, სრული პასუხი აგოს.

სხვა ქვეყნების საგარეო საქმეთა სამინისტროების დიპლომატებსა და თანამშრომლებს მოვუწოდებთ, რომ ჩვენს მამაც ქართველ კოლეგებთან სოლიდარობის ამ აქციას შეუერთდნენ", - ნათქვამია ლიეტუვის საგარეო საქმეთა სამინისტროს დიპლომატებისა და თანამშრომლების განცხადებაში.