ბათუმში საპროტესტო აქციის მონაწილეები აჭარის მთავრობის სახლთან აქცია-მსვლელობით დაბრუნდნენ. მოქალაქეები აცხადებენ, რომ „ქართული ოცნების“ ხელისუფლების პირობებში საქართველო სტრატეგიული პარტნიორებს კარგავს.

აქციის მონაწილეები აცხადებენ, რომ ხელისუფლებაში არალეგიტიმური მთავრობაა, რომელიც ქვეყანას მართავს და რუსეთისკენ მიჰყავს.

„აჭარის მთავრობის სახლთან ვაგრძელებთ პროტესტს, მნიშვნელოვანია, რომ ცივილურმა სამყარომ გაიგოს ჩვენი ხმა. საქართველოს გზა არის ევროპა და არ დავუშვებთ სხვას. გაიგოს არალეგიტიმურმა მთავრობამ, რომელიც ხელისუფლებაშია, ნუ ამოეფარებით სპეცრაზმელებს, ქართველი ხალხის უმრავლესობამ იცის, რომ ქვეყანაში საპარლამენტო არჩევნები გაყალბდა“, - განაცხადეს აქციის მონაწილეებმა.

აჭარის მთავრობის სახლთან სპეცრაზმის თანამშრომლები არიან მობილიზებული. თავის მხრივ, მთავრობის სახლთან მყოფი სტუდენტები საქართველოს ჰიმნს ასრულებენ.