ბათუმის შოთა რუსთაველის სახელობის სახელმწიფო უნივერსიტეტის სტუდენტები და პროფესორები საპროტესტო აქციას მართავენ.

უნივერსიტეტის ეზოში შეკრებილები ევროკავშირში გაწევრიანების პროცესის 2028 წლამდე შეჩერების შესახებ საქართველოს ხელისუფლების გადაწყვეტილებას აპროტესტებენ.

ამასთან, როგორც ისინი აცხადებენ, „ქართული ოცნება“ მშვიდობიანი აქციის მონაწილეებზე ძალადობს.

უნივერსიტეტთან შეკრებილებს სხვადასხვა სკოლის მოსწავლეები და მასწავლებლებიც შეუერთდნენ.

„არჩევნების გაუქმებას ვითხოვთ, ხელახლა უნდა ჩატარდეს სამართლიანი და ობიექტური არჩევნები. სტუდენტებთან ერთად პროფესორებიც არიან, სკოლის მოსწავლეებიც შემოგვიერთდნენ. ჩვენი ყველას ერთად გასაკეთებელია ეს საქმე, რათა ბოლომდე მივიყვანოთ ევროკავშირში გაწევრიანების საკითხი. რუსული რეჟიმი თავის მეთოდებით უნდა გავისტუმროთ ხელისუფლებიდან“, - აცხადებენ სტუდენტები.