თუკი არცერთი ადამიანი არაა დაკავებული, ვინც ასე სადისტურად უსწორდებოდა ახალგაზრდებს, ე.ი. ასეთი დავალება ჰქონდათ - რა უნდოდა ამ ადამიანების დაკავებასა და ამოცნობას? - პასუხისმგებლობა სრულად „ქართული ოცნებისაა“, - ამის შესახებ „ძლიერი საქართველოს“ ერთ-ერთმა ლიდერმა, ბადრი ჯაფარიძემ რუსთავში მიმდინარე საპროტესტო აქციაზე, საპროტესტო აქციებზე ბოლო დღეებში განვითარებულ მოვლენებთან დაკავშირებით, განაცხადა.

მისი თქმით, იმით, რომ არ მომხდარა არცერთი სამართალდამცავის დაკავება, დადასტურდა, რომ „არანაირი გამოძიება არ მიმდინარეობს“.

„ძალიან მარტივი საკითხია - თუ კი არცერთი ადამიანი არაა დაკავებული, ვინც ასე სადისტურად უსწორდებოდნენ ახალგაზრდებს, ე.ი. ასეთი დავალება ჰქონდათ, რომ ძალადობა განეხორციელებინათ. კიდევ ერთხელ დადასტურდა, რომ სინამდვილეში არანაირი გამოძიება არ მიმდინარეობს, თორემ რა უნდოდა ამ ადამიანების დაკავებასა და ამოცნობას? ან იმათ ამოცნობას, ვინც ჟურნალისტებს გაუსწორდა. ამ ადამიანების ამოცნობას ერთადერთი რამ სჭირდება - სურვილი. „ქართულ ოცნებას“ ამის სურვილი არ აქვს. ამით ახალისებენ ძალადობას, იმას, რომ ახალგაზრდებს ვითომდა პოლიციელები, თავს კვლავ დაესხნენ. ჩემთვის, ის ხალხი პოლიციელები არ არიან. ისინი არიან კრიმინალები. „ქართული ოცნებაა“ პასუხისმგებელი იმ ძალადობაზე, რომელიც ხორციელდება ახალგაზრდებზე, მშვიდობიან პროტესტში მონაწილე ინდივიდების მიმართ; მათზე, ვისაც უფლება აქვს გააპროტესტოს „ქართული ოცნების“ ანტიეროვნული პოლიტიკა. ვნახეთ, როგორ უსწორდებიან მათ დაკავების შემდგომ, როგორ უმოწყალოდ სცემენ, როგორ ამახინჯებენ. ამაზე პასუხისმგებლობა მთლიანად „ქართული ოცნებისაა“, მითუმეტეს მაშინ, როდესაც არცერთი ადამიანი არაა იდენტიფიცირებული, ვინც ამ სისაძაგლეს ჩადის და სადისტურად უსწორდება ადამიანებს“, - განაცხადა ბადრი ჯაფარიძემ.

ცნობისთვის, რუსთავში მოქალაქეებმა საპროტესტო მსვლელობა გამართეს. ისინი ახლა რუსთავის მერიის წინ იმყოფებიან.

რუსთავის მერიასთან მყოფი აქციის მონაწილეები ქალაქის მერთან, ნინო ლაცაბიძესთან შეხვედრას და მის მიერ სპეცრაზმის ძალადობრივ მოქმედებებზე მკაფიო პოზიციის დაფიქსირებას ითხოვენ.