ეს დღე საქართველოში არათუ ადამიანის უფლებების აღნიშვნის, არამედ ადამიანის უფლებების ფეხქვეშ გათელვის დღეა - რაც არ უნდა ნიღბები ატარონ, იცოდნენ, რომ გამოირკვევა ვინ სად იყო და ყველას დავიმახსოვრებთ - ამის შესახებ საქართველოს პრეზიდენტმა, სალომე ზურაბიშვილმა განაცხადა.

მისივე თქმით, დღეს საქართველოში ადამიანის უფლებები ფეხქვეშ ითელება.

„ეს დღე ითვლება როგორც ადამიანის უფლებების აღნიშვნის დღე. ეს დღე საქართველოში არათუ ადამიანის უფლებების აღნიშვნის, არამედ ადამიანის უფლებების ფეხქვეშ გათელვის დღეა. ასე უნდა ვახსენოთ ეს დღე და ასე დარჩება ეს დღე საქართველოს ისტორიაში. ყველანი, ვინც ამაში მონაწილეობდნენ ან კიდევ მიიღებენ მონაწილეობას ამ დღეებში, ისინიც საქართველოს ისტორიაში უთუოდ შევლენ. ქართველი ხალხი, ქართველი ერი ამას არასდროს დაივიწყებს. რაც არ უნდა ნიღბები ატარონ, იცოდნენ, რომ გამოირკვევა ვინ სად იყო და ყველას დავიმახსოვრებთ. დღეს არათუ ირღვევა, არამედ ფეხქვეშ ითელება უფლებები: მშვიდობიანი აქციის ჩატარება; ცრემლსადენი გაზის გამოყენება მშვიდობიანი დემონსტრანტების მიმართ; ქიმიური ნივთიერების გამოყენება მათ მიმართ; სპეციალური დანიშნულების რაზმები, რომლებიც არ ატარებენ მაიდენტიფიცირებელ ნიშნებს; გამოუძიებელი საქმეები და სისტემური დაუსჯელობა იმ ადამიანების, რომლებიც ახორციელებენ ამ რეპრესიებს; სამართალდამცავების მხრიდან ძალადობას აქვს ადგილი როგორც დაკავების დროს, და რაც ნიშანდობლივია, დაკავების შემდგომ პერიოდში... ეს ყველგან დაგმობილია. სახალხო დამცველმა თვითონ გამოიყენა სიტყვა „წამება“, ესეც შევა ისტორიაში”, - განაცხადა საქართველოს პრეზიდენტმა.