რუსეთის კურსკის რეგიონში უკრაინის ჯარების წინააღმდეგ ბრძოლაში რამდენიმე ასეული ჩრდილოეთ კორეელი ჯარისკაცი დაიღუპა და დაიჭრა, - ინფორმაციას The Guardian-ი ამერიკელ სამხედრო მაღალჩინოსანზე დაყრდნობით ავრცელებს.

„ჩვენი უახლესი შეფასებით, მსხვერპლი, რომელიც კორეის სახალხო დემოკრატიულმა რესპუბლიკამ განიცადა, რამდენიმე ასეულს შეადგენს, ეს მოიცავს ყველას - დაწყებული მსუბუქად დაშავებულებიდან დამთავრებული დაღუპულებით“, - განაცხადა ოფიციალურმა პირმა, რომელმაც ანონიმურობის პირობით ისაუბრა.

მისი თქმით, დაღუპულებსა და დაშავებულებს შორის ყველა რანგის ჯარისკაცია.

ამერიკელმა ოფიციალურმა პირმა განმარტა, რომ ჩრდილოეთ კორეელ ჯარისკაცებს საბრძოლო გამოცდილება არ აქვთ და შესაძლოა, სწორედ ეს განაპირობებს იმ მსხვერპლს, რასაც ისინი უკრაინელების წინააღმდეგ ბრძოლაში განიცდიან.

შეგახსენებთ, მანამდე უკრაინის შეიარაღებული ძალებს მთავარსარდალმა, ალექსანდრე სირსკიმ განაცხადა, რომ რუსეთი კურსკში ინტენსიურ შეტევას ჩრდილოეთ კორეელი ჯარისკაცების მონაწილეობით ახორციელებდა.