თვითმარქვია რეჟიმს, რომელმაც ქვეყანაში ქაოსი მოიტანა, ახლა აქვს შანსი კონსტიტუციურ ჩარჩოში დაბრუნებაში მიიღოს წვლილი. თუ ამას არ აკეთებს, ასეთ შემთხვევაში, ჩვენ გვიწევს სხვა რეჟიმში გადასვლა - სხვა მექანიზმი იქნება ის, რომ ჩამოიშალოს ხელისუფლება , - ამის შესახებ „ერთიანობა - ნაციონალური მოძროაბის“ ერთ-ერთმა ლიდერმა გიორგი ვაშაძემ ოპოზიციასა და საქართველოს პრეზიდენტს, სალომე ზურაბიშვილს შორის გამართული შეხვედრის დასრულების შემდეგ განაცხადა.

ვაშაძის თქმით, იმ სიახლეებზე, რაზეც დღეს შეთანხმდნენ 25 დეკემბერს, 19:00 საათზე, პრეზიდენტი, სალომე ზურაბიშვილი განცხადებას გააკეთებს.

„კარგი შეხვედრა იყო. ჩვენ ვისაუბრეთ, რა გარემოში უნდა ჩატარდეს ახალი არჩევნები, რომ მას საზოგადოების მხრიდან ნდობა ჰქონდეს. ამასთან დაკავშირებით შეთანხმება მიღწეულია - რა ტიპის ცვლილებები განხორციელდეს იმისთვის, რომ არჩევნები ნორმალურად ჩატარდეს.

ასევე, ძალიან მნიშვნელოვანი საკითხი არის ის რომ, ხელისუფლება საკონსტიტუციო ჩარჩოებიდან გასულია, ამიტომ, ამ ჩარჩოებში დააბრუნებს ახალი არჩევნები, მეტი არაფერი.

რაც შეხება მექანიზმს, ვისაუბრეთ - 29 დეკემბრის შემდეგ, რა ორგანიზაციული მექანიზმი უნდა იყოს, რომელიც საქართველოს ლეგიტიმურ პრეზიდენტთან, სალომე ზურაბიშვილთან ერთად წარმართავს პოლიტიკურ-საზოგადოებრივ პროცესს საქართველოში. საქართველოში პროტესტი აუცილებლად უნდა გაგრძელდეს, რისთვისაც დიდი მადლობა ყველას, ვინც ამ პროტესტში იღებს მონაწილეობას. სიახლეებზე, რომლებიც ჩვენთვისაც სიახლე იყო, ხვალ 19:00 საათზე გვექნება საუბარი. ორგანიზაციულ მექანიზმებზე ხვალ სალომე ზურაბიშვილი ისაუბრებს - თუ რა მექანიზმი წარმართვას პოლიტიკურ-საზოგადოებრივ პროცესს, რომელიც სჭირდება საქართველოს, რომელიც დაელაპარაკება პარტნიორებს და საქართველოს მოქალაქეებთან ექნება მუდმივი კომუნიკაცია.

თვითმარქვია რეჟიმს, რომელმაც ქვეყანაში ქაოსი მოიტანა, ახლა აქვს შანსი კონსტიტუციურ ჩარჩოში დაბრუნებაში თვითონაც მიიღოს წვლილი. თუ ამას არ აკეთებს, ასეთ შემთხვევაში, ჩვენ გვიწევს სხვა რეჟიმში გადასვლა. სხვა მექანიზმი იქნება ის, რომ ჩამოიშალოს ხელისუფლება, თვითმარქვია რეჟიმი, იმისთვის რომ ხალხმა დაიბრუნოს ძალაუფლება“, - განაცხადა ვაშაძემ.

რაც შეეხება კითხვას, თუ რას ფიქრობს, „კოალიცია ცვლილებებისთვის“ ლიდერის, ნიკა გვარამიას განცხადებაზე, რომ მისი პოზიციაა პარლამენტის დათხოვნა და ვადამდელი არჩევნები, ვაშაძე ამბობს, რომ საჭიროა დასაბუთებები და ყველა მხარეს შორის შეთანხმება.

„ჩვენ ყველა მექანიზმზე გვქონდა საუბარი. სხვადასხვა საკითხები დაისვა. ამას სჭირდება დასაბუთებები, ყველა მხარეს შორის შეთანხმება და იმ გზით უნდა ვიაროთ, რომლითაც მაქსიმალური კონსენსუსის გზა იქნება“,- განაცხადა ვაშაძემ.