თბილისის სახელმწიფო უნივერსიტეტის ეზოში შეკრებილი სხვადასხვა უნივერსიტეტის სტუდენტები მსვლელობით პარლამენტთან აქციას შეუერთდნენ.

აქციის მონაწილეებს თან აქვთ საქართველოს და ევროკავშირის დროშები და ტრანსპარანტები წარწერებით: “ხელოვნება იწყება თავისუფლებით”, “შეიძლება გაგვაჩუმოთ, მაგრამ ვერ გაგვაჩერებთ”.

დემონსტრანტების მოთხოვნები უცვლელია. ისინი საქართველოს მთავრობას მოუწოდებენ, რომ „დაინიშნოს ვადამდელი არჩევნები, დაუბრუნდეს ქვეყანა ევროპულ საგარეო კურსს და გათავისუფლდნენ პოლიტიკური პატიმრები”.

მანამდე რუსთაველის გამზირზე მიმდინარე საპროტესტო აქციას BTU-ს სტუდენტები, კურსდამთავრებულები და ლექტორებიც აქცია-მსვლელობით შეუერთდნენ.

ინფორმაციისთვის, მოქალაქეები „ქართული ოცნების“ 28 ნოემბრის გადაწყვეტილებას აპროტესტებენ, რომლის თანახმად, საქართველო 2028 წლის ბოლომდე ევროკავშირთან მოლაპარაკებების გახსნის საკითხს დღის წესრიგში არ დააყენებს. მათი მოთხოვნა უცვლელია - დაინიშნოს ხელახალი არჩევნები და გათავისუფლდნენ პროტესტის დროს დაკავებული მოქალაქეები.