საგამოძიებო კომისიის შექმნა, რომელიც წინა ხელისუფლების პერიოდს გამოიძიებს, ეს "ქართული ოცნების" მხრიდან ყურადღების გადატანის მცდელობაა, - ამის შესახებ კოალიცია "ძლიერი საქართველოს" ერთ-ერთმა ლიდერმა ბადრი ჯაფარიძემ, რუსთაველის გამზირზე მიმდინარე აქციაზე "ინტერპრესნიუსთან" განაცხადა.

მისი თქმით, ხალხის პროტესტი, რომელიც 44 დღეა მიმდინარეობს, არ გაჩერდება.

"ეს აქციები იქნება უწყვეტი, ეს ადამიანები აქ თავიანთი მოქალაქეობრივი ვალისა და ქვეყნის სიყვარულის გამო მოდიან. ილუზიაა, რომ ეს ხალხი სახლში შებრუნდება, შენელდება და შეჩერდება.

საგამოძიებო კომისიის შექმნა, რომელიც წინა ხელისუფლების პერიოდს გამოიძიებს, ეს "ქართული ოცნების" მხრიდან ყურადღების გადატანის მცდელობაა. თუ რაიმეს გამოძიება სურთ, 12 წელი ჰქონდათ და გამოეძიათ. ეს არის, თავიანთ მომხრეებს აჩვენონ, რომ ვითომ კარგ ფორმაში არიან. რა თქმა უნდა, ვერ არიან კარგ ფორმაში და მათი რღვევა დაწყებულია. მათ კარგად ესმით, რომ სანქციები, რომელიც მათი მისამართით დაწესდა, იზოლაციაში აქცევს", - განაცხადა ბადრი ჯაფარიძემ.