აშშ-ის კონგრესი განწყობილია, რომ მიიღოს ყველა ის გადაწყვეტილება, რომელიც სჭირდება დღეს ქართველ ხალხს, - ამის შესახებ „ძლიერი საქართველოს“ ერთ-ერთმა ლიდერმა, ბადრი ჯაფარიძემ განაცხადა, რომელიც ვიზიტით აშშ-ში იმყოფება.

ბადრი ჯაფარიძის განცხადებით, აშშ-ის ახალი ადმინისტრაციის პირობებში კიდევ უფრო დაჩქარდება ნაბიჯები, ქართველი ხალხის მხარდაჭერის კუთხით და გაიზრდება ყველა ის ძალისხმევა, რომელიც აუცილებელია იმისათვის, რომ საქართველოში დაინიშნოს ხელახალი არჩევნები.

„ჩვენი ვიზიტი შეერთებულ შტატებში ემსახურება იმას, რომ გაგრძელდეს და გაფართოვდეს ჩვენი ხალხის მისწრაფებების მხარდაჭერა - საქართველომ ერთხელ და სამუდამოდ დააღწიოს თავი რუსეთის იმპერიას და დაიბრუნოს ევროპული და დასავლური მომავალო, აღდგეს შეერთებული შტატების სტრატეგიული პარტნიორობა ჩვენს ქვეყანასთან როგორც კი ახალი არჩევნები ჩატარდება. უნდა გვესმოდეს, კონგრესი განწყობილია ისე, რომ მიიღოს ყველა ის გადაწყვეტილება, რომელიც სჭირდება დღეს ქართველ ხალხს. უნდა ითქვას, ახალ ადმინისტრაციაში, ტრამპის ადმინისტრაციაში, რომელიც 20 იანვრიდან იწყებს ფუნქციონირებას არიან გამორჩეული პოლიტიკოსები, ეს არის მარკო რუბიო, ბატონი მაიკლ უოლტსი, რომლებიც არიან გამორჩეულები სწორედ ავტორიტარული რეჟიმებისადმი შეურიგებლობით. ამიტომ, მე ველოდები რა თქმა უნდა იმას, რომ ნაბიჯები კიდევ უფრო მეტად დაჩქარდება ქართველი ხალხის მხარდაჭერის კუთხით და ყველა ის ძალისხმევა, რომელიც აუცილებელია იმისათვის, რომ საქართველოში დაინიშნოს ხელახალი არჩევნები და ის ჩატარდეს თავისუფალ და სამართლიან პირობებში აუცილებლად იქნება შეერთებული შტატების მხრიდან ძალიან მკაფიოდ მხარდაჭერილი და მე ვაპირებ სწორედ ეს თემები წამოვჭრათ ჩვენს პარტნიორებთან“, - განაცხადა ბადრი ჯაფარიძემ.