დღევანდელი შეხვედრის მერე ძალიან მკაფიო გახდა, რომ ყველა პრინციპულ საკითხთან დაკავშირებით აუცილებლად იარსებებს შეთანხმება როგორც პოლიტიკურ ჯგუფებს, ასევე სამოქალაქო საზოგადოებას შორის, - ამის შესახებ პარტია "დროას" წევრმა გიგა ლემონჯავამ მეხუთე პრეზიდენტ სალომე ზურაბიშვილთან შეხვედრის შემდეგ ჟურნალისტებს განუცხადა.

ლემონჯავას თქმით, ქვეყანაში აუცილებლად ჩატარდება ახალი არჩევნები და ბიძინა ივანიშვილი ხელისუფლებას ჩამოშორდება.

"ამ ქვეყანაში აუცილებლად შედგება ახალი არჩევნები და ამ არჩევნებში ბიძინა ივანიშვილი აუცილებლად ჩამოშორდება ხელისუფლებას. ჩვენ უნდა გვქონდეს ძალიან მკაფიო პოზიცია იმასთან დაკავშირებით, როგორ და რა წესით ჩატარდება ეს არჩევნები.

არ არსებობს საკითხი ოპოზიციურ პარტიებს, სამოქალაქო საზოგადოებას შორის, რომელთან დაკავშირებითაც ვერ შედგება კონსენსუსი. დღევანდელმა შეხვედრამ ესეც დაადასტურა კიდევ ერთხელ, ყველა საკითხზე შესაძლებელია შეთანხმების მიღწევა.

ძალიან მალე, რამდენიმე დღეში იარსებებს დოკუმენტი, რომელზეც იარსებებს ფართო პოლიტიკური, ფართო საზოგადოებრივი კონსენსუსი, რომლის გარშემოც უნდა შედგეს, რაც მთავარია სამოქალაქო კონსენსუსი, რა წესით უნდა ჩატარდეს ახალი არჩევნები და სრული პასუხისმგებლობით ვამბობ, რომ ამ შეხვედრის მერე ძალიან მკაფიო გახდა, ყველა პრინციპულ საკითხთან დაკავშირებით აუცილებლად იარსებებს შეთანხმება როგორც პოლიტიკურ ჯგუფებს, ასევე სამოქალაქო საზოგადოებას შორის", - განაცხადა გიგა ლემონჯავამ.