ტრამპის ადმინისტრაცია საჯაროდ აცხადებს, რომ სულ სხვა პოლიტიკის მატარებლები არიან, ვიდრე ჯო ბაიდენი იყო - ეს ძირითად შემთხვევაში საქართველოს და ჩვენი საზოგადოების პოლიტიკას ემთხვევა და აქედან გამომდინარე იმედი გვაქვს, რომ აშშ-სთან სტრატეგიული ურთიერთობები აღდგება, - ასე უპასუხა დეპუტატმა გურამ მაჭარაშვილმა დონალდ ტრამპის ინაუგურაციასა და მოლოდინებზე დასმულ შეკითხვას.

ამასთან, როგორც მაჭარაშვილმა აღნიშნა, „ტრამპისა და მისი მომხრეების მხრიდან ითქვა, რომ რუსეთთან მიმართებაში ე.წ სანქციებს აუცილებლად გადახედავენ".

მაჭარაშვილის თქმით, დღეს აშშ-ს პრეზიდენტი ხდება ადამიანი, რომელმაც წინასაარჩევნოდ ამერიკის სამომავლო საგარეო და საშინაო პოლიტიკა მკაცრად განსაზღვრა.

„საგარეო პოლიტიკაში პირდაპირ თქვა, რომ ის უკრაინაში ომს დაასრულებს და ჩინეთის სახელმწიფოს მეთაურთან ერთად აპირებს, მსოფლიოში მშვიდობა შეინარჩუნოს.

შიდა, ეროვნულ პოლიტიკაში თქვა, რომ აკრძალავს ლგბტ და ტრანსგენდერულ სიგიჟეებს. ასევე სკოლებში ოჯახური ღირებულებების სწავლებას დაუშვებს. ჯო ბაიდენს ტრამპი არც ერთ საკითხში არ ეთანხმებოდა - შესაბამისად, გამოდის, რომ მსოფლიო დღის წესრიგი აუცილებლად შეიცვლება.

აქედან გამომდინარეობს ზუსტად ის მოლოდინი, რომ მსოფლიო დღის წესრიგის შეცვლასთან ერთად ეს მოვლენები საქართველოზეც ბუნებრივად აისახება. რადგან ტრამპს აქვს საერთაშორისო საგარეო პოლიტიკაში მშვიდობის და უკრაინაში ომის დასრულების სურვილი, ეს საქართველოს სახელმწიფოსთან პირდაპირ ინტერესშია. აქედან გამომდინარეობს, რომ იმედი გვაქვს ამერიკის შეერთებულ შტატებთან ურთიერთობის გადატვირთვის შესაძლებლობა გვექნება. ბუნებრივად მოხდება ის, რომ ევროკავშირშიც გაიაზრებენ, თუ რა პოლიტიკის მატარებელი ადამიანი მოვიდა პრეზიდენტად აშშ-ში და ბუნებრივად მოხდება ევროკავშირშიც გარკვეული ცვლილებები - საქართველოსთან მიმართებაში ურთიერთობების გადატვირთვა აუცილებლად მოხდება.

სტრატეგიული ურთიერთობის მომხრე ვიყავით და ვიქნებით, ოღონდ იმ შემთხვევაში და იმ პირობებით, რომ ჩვენ აღგვიქვამენ, როგორც სუვერენულ და ტრადიციულ ქვეყანას", - განაცხადა გურამ მაჭარაშვილმა.