უნგრეთის პრემიერ-მინისტრის პოლიტიკური დირექტორი - ევროკავშირში გაწევრიანებისკენ საქართველოს მისწრაფებებს მხარს მტკიცედ ვუჭერთ, რადგან ეჭვგარეშეა, რომ საქართველო ევროკავშირს მიეკუთვნება
ევროკავშირში გაწევრიანებისკენ საქართველოს მისწრაფებებს მხარს მტკიცედ ვუჭერთ, რადგან ეჭვგარეშეა, რომ საქართველო ევროკავშირს მიეკუთვნება, - ამის შესახებ უნგრეთის პრემიერ-მინისტრის, ვიქტორ ორბანის პოლიტიკური დირექტორი, ბალაჟ ორბანი სოციალურ პლატფორმა X-ზე წერს.
„უნგრეთი საქართველოს გვერდით დგას და ბრიუსელის პოლიტიკურ შანტაჟზე უარს ამბობს. საქართველო, ისევე როგორც უნგრეთი, ბრიუსელის ბიუროკრატების მხრიდან მუდმივ ზეწოლას განიცდის. 2023 წლის დეკემბერში კანდიდატის სტატუსის მოპოვების მიუხედავად, გაწევრიანების შესახებ მოლაპარაკებები არჩევნების შედეგების გამო ფაქტობრივად გაყინულია - მკაფიო გზავნილი იმისა, რომ საქართველოს ევროკავშირში გაწევრიანება ბრიუსელის მოთხოვნების ზედმიწევნით შესრულებაზეა დამოკიდებული. საქართველოს ხელისუფლების წინააღმდეგ ბრიუსელისა და სოროსის ქსელის თავდასხმები უნდა შეწყდეს, ისევე როგორც მათი ოპოზიციის დაფინანსება. ევროკავშირში გაწევრიანებისკენ საქართველოს მისწრაფებებს მხარს მტკიცედ ვუჭერთ, რადგან ეჭვგარეშეა, რომ საქართველო ევროკავშირს მიეკუთვნება!“, - წერს ბალაჟ ორბანი.
შეგახსენებთ, გუშინ, უნგრეთში ვიზიტის ფარგლებში საქართველოს პარლამენტის თავმჯდომარე შალვა პაპუაშვილი უნგრეთის პრემიერ-მინისტრ ვიქტორ ორბანს შეხვდა.
შეხვედრის შემდეგ უნგრეთის პრემიერ-მინისტრმა, ვიქტორ ორბანმა სოციალურ ქსელში დაწერა, რომ „დროა, ბრიუსელში ბიუროკრატებმა და სოროსის ქსელმა საქართველოს მთავრობაზე თავდასხმა შეწყვიტონ“.
„საქართველოს სუვერენიტეტისთვის ბრძოლაში პარლამენტის თავმჯდომარეს, შალვა პაპუაშვილს ჩემი მხარდაჭერა გამოვუცხადე“, - დაწერა ორბანმა.
v-if="article.gallery" v-html="article.gallery"
