საქართველოს დამოუკიდებლობის ისტორიაში ამხელა ინვესტიცია ერთ, კონკრეტულ პროექტში არასდროს განხორციელებულა. ძალიან მეამაყება, როგორც ამ ქვეყნის მოქალაქეს, რა თქმა უნდა, ძალიან მიხარია, როგორც დედაქალაქის მერს, რომ ამ ტიპის პროექტები განხორციელდება ჩვენ ქვეყანაში, - ამის შესახებ თბილისის მერმა კახა კალაძემ განაცხადა, როდესაც ისაუბრა აბუ-დაბიში ვიზიტის ფარგლებში გაფორმებულ შეთანხმებაზე, რაც საქართველოში 6 მილიარდი აშშ დოლარის ინვესტირებას გულისხმობს.

როგორც კახა კალაძემ აღნიშნა, ამ პროექტების განხორციელებაში ჩაერთვებიან ქართული კომპანიებიც.

„2 დღის წინ დასრულდა პრემიერ-მინისტრის ძალიან მნიშვნელოვანი ოფიციალური ვიზიტი არაბთა გაერთიანებულ საემიროებში, რომლის ფარგლებში ჰქონდა სხვადასხვა ტიპის შეხვედრები. შეხვედრა იყო ასევე, არაბთა გაერთიანებული საემიროების პრეზიდენტთან, იყო ბიზნესშეხვედრები. მინდა კიდევ ერთხელ გავუსვა ხაზი იმ მემორანდუმს, რომელსაც ხელი მოეწერა, რაც ძალიან მნიშვნელოვანია ჩვენი ქვეყნისთვის, ორმხრივი თანამშრომლობისთვის. საქართველოში შემოდის ერთ-ერთი უძლიერესი დეველოპერული კომპანია MR GROUP, რომელიც მოღვაწეობს მსოფლიოს სხვადასხვა ქვეყნებში, მაგალითად, დუბაიში ბევრია ნამყოფი, აბუ-დაბიში, ყველა ძირითადი შენობა-ნაგებობა, არქიტექტურული სილამაზით ცათამბჯენები აღნიშნული კომპანიის განხორციელებული პროექტებია.

სხვადასხვა დეველოპერულ პროექტებში დაახლოებით, 6 მლრდ. დაიხარჯება თბილისსა და აჭარაში, რაც ძალიან მნიშვნელოვანია. მნიშვნელოვანია ეკონომიკური განვითარების თვალსაზრისით, ახალი სამუშაო ადგილების შექმნისთვის, მაღალანაზღაურებადი ახალი სამუშაო ადგილები შეიქმნება. ამ პროექტების განხორციელებაში ჩართული იქნება ქართული კომპანიები და პირდაპირ შემიძლია ვთქვა, საქართველოს დამოუკიდებლობის ისტორიაში ამხელა ინვესტიცია ერთ, კონკრეტულ პროექტში არასდროს განხორციელებულა. ძალიან მეამაყება, როგორც ამ ქვეყნის მოქალაქეს, რა თქმა უნდა, ძალიან მიხარია, როგორც დედაქალაქის მერს, რომ ამ ტიპის პროექტები განხორციელდება ჩვენ ქვეყანაში, თბილისში და ამხელა მასშტაბისა და შესაძლებლობის მქონე კომპანია მსოფლიო ერთ-ერთი უძლიერესი კომპანია MR GROUP შემოდის საქართველოში, რაც რა თქმა უნდა, მისასალმებელია და ძალიან დიდი სარგებლის მოტანა შეუძლია ჩვენი ქვეყნის ეკონომიკური განვითარებისთვის და ა.შ“, - განაცხადა კახა კალაძემ.