ძალიან ცუდი გადაწყვეტილება მიიღო „ქართულმა ოცნებამ“, პრაქტიკულად ბოიკოტი გამოუცხადა საპარლამენტო ასამბლეას, - ამის შესახებ „ძლიერი საქართველოს“ ლიდერმა, ბადრი ჯაფარიძემ განაცხადა, რითაც „ქართული ოცნების“ დელეგაციის მიერ ევროპის საბჭოს საპარლამენტო ასამბლეაში მუშაობის შეწყვეტას ეხმაურება.

ბადრი ჯაფარიძის თქმით, აღნიშნული გადაწყვეტილებით „ქართული ოცნება“ საქართველოს სახელმწიფოებრივ ინტერესებს აზიანებს.

„ამ გადაწყვეტილებით „ქართული ოცნება“ ზიანს აყენებს ჩვენს ქვეყანას. ეს ზიანს ვერ მიაყენებს საპარლამენტო ასამბლეას, ეს დელეგაცია იქნება თუ არა იქ, საპარლამენტო ასამბლეას მუშაობაში ვერანაირად ვერ შეუშლის ხელს, უარყოფით ელემენტს ვერ შეიტანს, მაგრამ აყენებს ზიანს ჩვენს ქვეყანას. ეს კიდევ ერთი ნაბიჯია ჩვენი ქვეყნის იზოლაციისკენ. ხაზგასმით მინდა ვთქვა, რომ კიდევ ერთხელ გამოავლინა „ქართული ოცნების“ დელეგაციამ თავისი ბუნება. ნაცვლად იმისა, რომ ითანამშრომლოს 46 წევრი ქვეყნისგან შემდგარი ევროპის საბჭოს საპარლამენტო ასამბლეასთან, ამბობს, რომ მონაწილეობას არ მიიღებს მუშაობაში და ამით ჩვენ სახელმწიფოს ინტერესებს აყენებს ზიანს“, - განაცხადა ბადრი ჯაფარიძემ.