„თბილისი მოლთან“ სტრატეგიული მნიშვნელობის მქონე ობიექტის ჯგუფურად ბლოკირების მცდელობის ბრალდებით დაკავებული, დიმიტრი ბიძინაშვილი თავს დამნაშავედ არ თვლის და ბრალს არ ეთანხმება. მისივე თქმით, მის წინააღმდეგ საქმე პოლიტიკურად არის მოტივირებული.

„არ ვეთანხმები ბრალს, არ ვთვლი თავს დამნაშავედ. ვთვლი, რომ ჩემს წინააღმდეგ საქმე პოლიტიკურად არის ნაწარმოები. ფარული მიყურადების საქმე დევს პროკურატურაში, მაგრამ დღემდე არავინ შემხმიანებია. თავისუფლებისთვის ბრძოლა დანაშაული არაა. ამას ჩემს დანაშაულად არ ვთვლი, რომ ამ ქვეყნის კეთილდღეობისთვის ვიბრძვი. ვთვლი, რომ ბრძოლა უნდა გავაგრძელოთ, იმ ხალხისთვის, ვინც რუსთაველზე ტყვიას შუბლს უშვერდა. ამ ხალხმა თავისი სიცოცხლე გაწირა, საკუთარი ჯანმრთელობა დადო, რომ აქ ვყოფილიყავით. ეს ბრძოლა გრძელდება და გავიმარჯვებთ სახელოვნად“,- განაცხადა ბრალდებულმა, დიმიტრი ბიძინაშვილმა.