მიღებული დრაკონული კანონებით, მედიის გაკონტროლების მექანიზმის შემოღებით, ივანიშვილი ქვეყანაში უკვე დიქტატურას ამყარებს - მნიშვნელოვანია პარტიამ „გახარია საქართველოსთვის“ მიიღოს გადაწყვეტილება და აქ დროის გაწელვა იმუნიტეტისა და დაფინანსების გამო, არის აბსოლუტურად არარელევანტური, არასამართლიანი და არაობიექტური,- ამის შესახებ კოალიცია „ძლიერი საქართველოს“ ლიდერმა მამუკა ხაზარაძემ, საგანგებო მიმართვის დროს განაცხადა.

მისი თქმით, „ქართულმა ოცნებამ“ ქვეყანა ბოლო სამი თვის განმავლობაში უკან დახია და ახლა პარტია „გახარია საქართველოსთვის“ მოუწოდებს, უარი თქვან საპარლამენტო მანდატებზე, რადგან პარლამენტში დარჩენა „ბიძინა ივანიშვილის- რუსულ ხელისუფლებასთან, რუსული საქმის კეთებას ნიშნავს.

„26 ოქტომბერს არჩევნების მიტაცებიდან დღემდე ივანიშვილის არალეგიტიმურმა, „რუსულმა მთავრობამ“ ქვეყანა ეგზისტენციალური საფრთხის წინაშე დააყენა. მინდა გაგახსენოთ, თუ რა მოხდა ბოლო 3 თვის განმავლობაში - ანტიკონსტიტუციურად გააჩერა ევროკავშირში საქართველოს გაწევრიანების პროცესი, შეწყდა სტრატეგიული პარტნიორობა შეერთებულ შტატებთან, დაიწყო საპოლიციო ტერორი, რის შედეგადაც მივიღეთ 400-ზე მეტი დასახიჩრებული მშვიდობიანი დემონსტრანტი და 500 პოლიტიკური პატიმარი, არალეგიტიმური მთავრობის პირველი პირები დასანქცირებული არიან ამერიკისგან, დიდი ბრიტანეთისგან და ევროპისგან. სანქცირების პროცესი კვლავაც გრძელდება. არაღიარებულმა „ქართულმა ოცნებამ“ დატოვა ევროსაბჭოს საპარლამენტო ასამბლეა და ამით კიდევ ერთხელ თქვა უარი ქვეყნის ევროპულ მომავალზე. მიღებული დრაკონული კანონებით, მედიის გაკონტროლების მექანიზმის შემოღებით, ივანიშვილი ქვეყანაში უკვე დიქტატურას ამყარებს. ვხედავთ ტურისტებისგან დაცლილ სასტუმროებს, მძიმე ვითარებაშია კერძო სექტორი და უახლეს პერიოდში გველოდება საკმაოდ სერიოზული ეკონომიკური კრიზისი.

მიუხედავად ამისა, ქართველი ხალხი მტკიცედ დგას იმ ფასეულობებისა და ღირებულებების სადარაჯოზე, რასაც თავისუფლება ჰქვია. ამისთვის კი ჩვენ ვხედავთ შეუპოვარ ბრძოლას ჩვენი ქვეყნის ქუჩებში.

ახლა მნიშვნელოვანია, რომ როგორც საერთაშორისო საზოგადოებამ მოაქცია არალეგიტიმური ხელისუფლება იზოლაციაში ჩვენც, დავტოვოთ მარტო, რომ მათი საქმიანობა რამის მომტანი არ გახდეს, ისედაც არაფრის მომტანი არ არის, მაგრამ ლეგალურად დავტოვოთ - იზოლაციაში

რუსთაველის 8 ნომერში შეკრებილი ადამიანები, სრულიად უუნარონი ხდებიან საკანონმდებლო საქმიანობისთვის, რადგან ოპოზიციური მანდატების გაუქმებით, ე.წ. დეპუტატთა რიცხვი 89-მდე მცირდება, რაც იმას ნიშნავს, რომ შეუძლებელია ლეგიტიმური საკითხის მისაღებად. მაგალითად: 113 ხმაა საჭირო ერთი მოწვევის პარლამენტის მიერ კონსტიტუციის გადასინჯვისთვის, 113 ხმაა საჭირო ცალკეული საერთაშორისო ხელშეკრულებების რატიფიკაციისთვის; 100 ხმაა საჭირო ორი მოწვევის პარლამენტების მიერ კონსტიტუციის გადასინჯვისთვის, 100 ხმაა საჭირო პრეზიდენტის იმპიჩმენტისთვის, 100 ხმაა საჭირო უცხოეთის მოქალაქეზე მიწის გასხვისებისთვის, 90 ხმაა საჭირო კონკორდატში ცვლილების დასამტკიცებლად, 90 ხმაა საჭირო საკონსტიტუციო სასამართლოს მოსამართლეების ასარჩევად, 90 ხმაა საჭირო იუსტიციის საბჭოს წევრების ასარჩევად, 90 ხმაა საჭირო სახალხო დამცველის ასარჩევად, ქართულ ოცნებას კი პარლამენტში დღეს მხოლოდ 89 მანდატი აქვს!

ეს იყო ოთხი პროდასავლური პარტიის სტრატეგია, რომ „ქართული ოცნებამ“, რომელმაც რუსული სპეცოპერაცია ჩაატარა მარტო დარჩენილიყვნენ და ვერ მიეღოთ ვერანაირი გადაწყვეტილება და თავიანთი თავი ეძულებინათ, რომ ახალი არჩევნები ჩაენიშნათ.

მიუხედავად იმისა, რომ „ქართულ ოცნებას“ 89 დეპუტატი გააჩნია, ქაღალდზე 101 დეპუტატი არსებობს, საკითხი დგას იმ კოალიციაზე, რომელსაც „გახარია საქართველოსთვის“ ჰქვია და აქ ჩნდება კითხვა, ფარული ლეგალიზაციის და ხელშეწყობას იმ ძალისადმი, ქართველ ხალხს რუსეთისკენ მიათრევს და ისეთი სისტემებისკენ, როგორიც ირანი და კომუნისტური პარტიის ჩინეთია.

მინდა გითხრათ, რომ საბოლოო გამარჯვებას, რომ მივაღწიოთ ამ მიმართულებით ბრძოლა გრძელდება, ყველა მიმართულებით, მნიშვნელოვანია „გახარია საქართველოსთვის“ მიიღოს გადაწყვეტილება, და აქ დროის გაწელვა იმუნიტეტისა და დაფინანსების გამო არის აბსოლუტურად არარელევანტური, არასამართლიანი და არაობიექტურია. და მათ უნდა მიიღონ გადაწყვეტილება ძალიან სწრაფად. არჩევანი მათზეა და ბრძოლაში მყოფმა ადამიანებმა, ჩვენ კოალიცია „ძლიერმა საქართველო“ უნდა ვიცოდეთ ვინ არის ჩვენი პარტნიორი და როგორი ბრძოლა უნდა გავაგრძელოთ ქვეყნის თავისუფლებისთვის. ამ პარლამენტში დარჩენა, ბიძინა ივანიშვილის „რუსულ ხელისუფლებასთან“, რუსული საქმის და რუსული საქმის კეთებას ნიშნავს.

დროზე დავამთავროთ ეს საპარლამენტო ამბავი დავტოვოთ 89 მანდატში ქართული- რუსული ხელისუფლება, იმისათვის, რომ სწრაფად მივაღწიოთ ახალ არჩევნებს და ჩვენი პატიმრები გავათავისუფლოთ“,- განაცხადა მამუკა ხაზარაძემ.