საქართველოს მეხუთე პრეზიდენტის, სალომე ზურაბიშვილის განცხადებით, აქციების დროს დაკავებულებს და თავისუფლებისთვის მებრძოლ ოჯახებს, ასევე საჯარო მოხელეებს, რომლებიც სამსახურებიდან გათავისუფლდნენ, დაუწესდება შეღავათები სხვადასხვა მიმართულებით.

როგორც ზურაბიშვილმა აქციების დროს დაკავებულების ოჯახის წევრებთან შეხვედრაზე განაცხადა, ეს არის მოსაზრება, რომელიც უკავშირდება ახალი ფონდის დაარსებას, რომელიც არ იქნება პოლიტიკური ფიგურების მიერ მართული.

ამასთან, სალომე ზურაბიშვილის აზრით, დაკავებული პირები არიან "თავისუფლებისთვის მებრძოლები" და სწორედ ამ სახელით უნდა გაიცნოს ისინი საერთაშორისო საზოგადოებამ.

“დროა, ამ ადამიანებს დავარქვათ სახელი, ისინი არ არიან პოლიტიკური პატიმრები, რადგან არ არიან არცერთი პოლიტიკური პარტიის წევრები. ეს არ არის პოლიტიკური ბრძოლა იმ გაგებით, რომ შეიძლება პოლიტიკური პატიმრები იყვნენ. ეს არის სახელმწიფოსთვის ბრძოლა და ეროვნული ბრძოლა. ასევე დასახელება “სინდისის პატიმრები” ბოლომდე ვერ ასახავს. მგონია, რომ ძალიან სწორი სახელი იქნება, რომ დავარქვათ “თავისუფლებისთვის მებრძოლები” - Freedom fighters. თუ დამეთანხმებით, ამ სახელწოდებით უნდა გავიტანოთ მათი სახელი საზღვარგარეთ, პირველ რიგში, მიუნხენის კონფერენციაში, სადაც მე ვიქნები. ასევე ინტერვიუებში, რომელიც ბევრი მექნება და ამით გავაცნო ეს ადამიანები საზღვარგარეთ, რომ გაიგონ რაში არის მათი ბრძოლა. ეს ბრძოლა, მართლაც არის თავისუფლებისთვის, დამოუკიდებლობისთვის და მომავლისთვის.

მებრძოლებს მინდა დავპირდე, რომ როგორც კი ჩატარდება ახალი არჩევნები და იქნება ახალი ხელისუფლება, მათ დაუწესდეს შეღავათები სხვადასხვა მიმართულებით. ამიტომ ვამბობ, რისთვის მჭირდება სხვების თანხმობა, ეს ვერ იქნება მხოლოდ ჩემი გადაწყვეტილება. როგორც სხვადასხვა ქვეყანაში ხდება ომის ვეტერანებისთვის, ეს არის ჩვენი დღევანდელი ომი.

“ქართულო ოცნება”, რომელიც მშვიდობას გვპირდებოდა, თავის მოსახლეობას გამოუცხადა ომი და ვართ ომში. ესენი არიან ჩვენი “ახალგაზრდა ვეტერანები”, მაგრამ მართლა უნდა მივხედოთ მათ. ზოგს დავუწესოთ სტიპენდია, ვის მივცეთ პრიორიტეტი, როცა ლაპარაკი იქნება საჯარო სამსახურში დაბრუნება თუ შესვლა და ა.შ. ვიფიქრებთ რა ტიპის შეღავათები უნდა იყოს. ეს იქნება სოლიდარობის გამოცხადება საზოგადოების და პოლიტიკური სპექტრისთვის. ეს არის მოსაზრება, რომელიც უკავშირდება ახალი ფონდის დაარსებას, რომელიც არ იქნება რომელიმე პოლიტიკური ფიგურების მიერ მართული, უფრო იქნება საზოგადოების მიერ მართული. საზოგადოებაში არის მოთხოვნა, რომ იყოს ერთი დიდი საზოგადოების ამსახველი ფონდი, რომელიც დაეხმარება პატიმრების და თავისუფლებისთვის მებრძოლ ოჯახებს. ასევე დაეხმარება იმ ადამიანებს, რომლებიც დაჯარიმებულები არიან, ან დაჯარიმდებიან, ასევე იმ ადამიანებისთვის, რომლებიც დღეს საჯარო სექტორში არიან დასჯილები, დაკარგეს თავიანთი სამსახური, რადგან პროტესტი გამოხატეს”,- განაცხადა ზურაბიშვილმა.

ამასთან, ზურაბიშვილმა აღნიშნა, რომ ყველა “ტიტუშკა” , რომელიც იქნება ამოცნობილი, იქნებიან დასჯილები, პირველ რიგში, საზოგადოების მიერ.

მისივე თქმით, ყველამ უნდა იცოდეს, რომ არავინ დარჩება დაუსჯელი, ვინც “თავისი მოსახლეობის წინააღმდეგ მიდის”.

“ყველა “ტიტუშკა”, რომელიც იქნება ამოცნობილი, იქნება დასჯილები, პირველ რიგში, საზოგადოების მიერ, როდესაც მათი ვინაობა ყველასთვის იქნება ცნობილი. შავი წერტილი და ნიშანი, რომელიც დაგედება, შეიძლება მთელი ცხოვრება ატარო. ასევე სანქციების სია უნდა გაიზარდოს. ყველამ უნდა იცოდეს, რომ არავინ დარჩება დაუსჯელი, როდესაც თავისი მოსახლეობის წინააღმდეგ მიდის”, - განაცხადა ზურაბიშვილმა.