მე არ ვცდილობ ამ ოპოზიციის გაერთიანებას, ერთხელ და სამუდამოდ, ყველამ გაიგოს, რომ ეს არ არის ჩემი მიზანი. მე არ ვარ ერთიანი სიების მომხრე იმიტომ, რომ ვთვლი, ამ ქვეყანას ყველაზე მეტი ერთპარტიულობამ დაუშავა, ამიტომ, საჭიროა მივეჩვიოთ მრავალპარტიულობას, - ამის შესახებ საქართველოს მეხუთე პრეზიდენტმა სალომე ზურაბიშვილმა „პალიტრანიუსთან“ ინტერვიუში განაცხადა.

ზურაბიშვილის თქმით, თუ ოპოზიციას დასჭირდა, ის იქნება ლიდერი, მაგრამ არა ერთპიროვნული და არა დიდი ხნით.

„მე არ ვცდილობ ამ ოპოზიციის გაერთიანებას, ერთხელ და სამუდამოდ, ყველამ გაიგოს, რომ ეს არ არის ჩემი მიზანი. მე ვცდილობ იმას, რომ იყოს იმ ზომის ერთობა, რომელიც აძლიერებს ოპოზიციას და ყველა მის ნაწილს. ამ ფორმით იყო სწორედ წარდგენილი და დღესაც ძალაშია ქარტია იმიტომ, რომ ქარტია არის ერთობის პროგრამა - როცა დაბრუნდება ოპოზიცია ძალაუფლებაში და ეს შეიძლება იყოს მრავალპარტიული.

მე არ ვარ ერთიანი სიების მომხრე იმიტომ, რომ ვთვლი, ამ ქვეყანას ყველაზე მეტი ერთპარტიულობამ დაუშავა, ამიტომ, საჭიროა მივეჩვიოთ მრავალპარტიულობას. რთულია, ამიტომ, ვცდილობ, მათ შორის კოორდინაციით, რომ არ იყოს დაპირისპირება. ერთი არის ერთად რაღაც საქმის კეთება და გააკეთეს საქმე - სტრასბურგში რომ ჩავიდნენ ერთად, ამით ძალიან მაგარი საქმე გააკეთეს, ესე იგი, შეუძლიათ. მე დარწმუნებული ვარ, კიდევ ბევრი შეუძლიათ, თუ არ იქნება ცრუ იმედები, რომ უცებ შეიქმნება ერთიანი, მონოლითური ოპოზიცია, თავისი ერთი ლიდერით.

მე ვიქნები სხვა ტიპის ლიდერი, თუ ასეთი ლიდერი დასჭირდა ოპოზიციას. მე არ ვიქნები ერთპიროვნული. ჯერ ერთი, დიდი ხნით არ ვიქნები ლიდერი, თუ უნდა ვიყო, მაგრამ ესეც მოვლენებზეა დამოკიდებული.

მთავარი არის ერთობა იმ მიმართულებაზე, საითკენაც მივდივართ და მგონი, ყველამ უნდა ჩაიხედოს ხელახლა ქარტიაში, ვისაც ხელი აქვს მოწერილი, ისევ უნდა მოაწეროს.

ჩემი ერთ-ერთი მოთხოვნა ევროპელებისადმი არის ის, რომ მოგვცენ იმის პირობა, რომ ჩვენ როგორც კი დავუბრუნდებით ამ გზას, აღარ დაგვაკავებენ ამ გზაზე და მოგვცემენ საშუალებას, რომ სწრაფად აღვადგინოთ ის დაკარგული დრო, რაც ამათმა (“ქართულმა ოცნებამ”) დაგვაკარგვინეს. ჩვენ ძალიან გვჭირდება ეს ურთიერთობები და ეს ძალიან სწრაფად უნდა აღდგეს, როგორც კი ჩვენ ვაჩვენებთ, რომ ვუბრუნდებით ჩვენს უალტერნატივო გზას”, - განაცხადა ზურაბიშვილმა.

როგორც მან აღნიშნა, ოპოზიცია და საზოგადოება ახლა არჩევნებისთვის უნდა მოემზადოს, რათა არ განმეორდეს ის, რაც წინა არჩევნებზე მოხდა. მისი განმარტებით, ის მოხალისეები, რომლებიც ახლა სტიქიის ზონაში მუშაობენ, კომისიის წევრები და დამკვირვებლები უნდა იყვნენ, რადგან ისინი არიან საზოგადოების ძალა.

“ჩვენ თუ ველოდებით იმას, რომ მთლიანად დაინგრეს სისტემა, შეიძლება ასეც მოხდეს, არ არის გამორიცხული, მაგრამ, ამავე დროს ჩვენ უნდა მოვემზადოთ არჩევნებისთვის. არ შეიძლება, ველოდოთ, როდის დაინიშნება არჩევნები იმისთვის, რომ მოვემზადოთ. ეს არის ის, რაც მოხდა წინა არჩევნებზე, რომ ამ “რუსული კანონის” გამო და ბევრი რამის გამო, აქცენტი გადავიტანეთ სხვა რაღაცაზე და არა არჩევნების მომზადებაზე.

დღეს რომ ვუყურებ ამ მოხალისეებს, ესენი არიან ის ადამიანები, რომლებიც უნდა იყვნენ კომისიებში, რომლებიც უნდა იყვნენ დამკვირვებლები, რომლებსაც არ შეეშინდებათ “ტიტუშკების”. ეს არის საზოგადოების ის ძალა, რომელიც უნდა გამოჩნდეს იმისთვის, რომ აღარასდროს დავუთმოთ არჩევნები”, - აღნიშნა სალომე ზურაბიშვილმა.