ვახტანგ ძაბირაძე - ხელისუფლებას უნდა, პროტესტი გააძევოს ქუჩიდან, თუმცა ამას ვერ აღწევს
მე არ ველოდები, რომ ხელისუფლება რაღაც დათმობებზე წავა, ჯერჯერობით არ წავა. თუ ჩვენ მართლა ვთვლით, რომ ძალიან კრიტიკული სიტუაციაა, უფრო აქტიური ფაზა უნდა დაიწყოს პროტესტის, მაგრამ გარღვევა იქნება მაშინ, როდესაც რუსთაველის გამზირიდან პროტესტი საზოგადოებაში გავა, ამისთვის საჭიროა კოორდინირებული მოქმედება, - ამის შესახებ ანალიტიკოსმა ვახტანგ ძაბირაძემ “პალიტრანიუსის” გადაცემა “პოლიტიკურ სივრცეში” განაცხადა.
ძაბირაძის თქმით, ოპოზიციურმა პარტიებმა ერთმანეთთან მისასვლელი გზები უნდა იპოვონ.
“რაც ქუჩაში ხდება, დაახლოებით, იგივე პროცესია პოლიტიკაშიც, რადგან ქუჩის გაყოფა პოლიტიკისგან საქართველოში მაინც და მაინც არ გამოდის. მეორეა, რომ ამ ქუჩამ თავის დროზე ამ პოლიტიკურ ელიტაზე უარი თავად თქვა და დღეს სიტუაცია, შესაძლოა, ცოტა შეიცვალა - დადგა მომენტი, როდესაც ხელისუფლებას უნდა, რომ პროტესტი ქუჩაში არ იყოს და როგორმე გააძევოს ქუჩიდან, თუმცა ამას ვერ აღწევს და მეორე მხარეს ოპოზიციაც ვერ აკეთებს იმას, რომ როგორმე არჩევნები დაანიშნინოს ხელისუფლებას. ეს, ალბათ, დიდხანს გაგრძელდება იმიტომ, რომ სხვა გამოსავალს ამ წუთში, ვერ ვხედავ.
როცა ვლაპარაკობთ, რომ პოლიტიკოსები უნდა გააქტიურდნენ, ისიც სათქმელია, რას ვგულისხმობთ ამაში - თუ გააქტიურებაში ვგულისხმობთ, რომ მდუმარე აქციები გადავიტანოთ მიტინგებში, ამისთვის ეს პოლიტიკური სპექტრი მზად არ არის. თუ ეს პოლიტიკური სპექტრი გაერთიანდება, ეს უფრო მისაღები იქნება საზოგადოებისთვის, თუ უფრო ნაკლებად მისაღები? ახლა არის ლაპარაკი სალომე ზურაბიშვილთან რაღაც ტიპის შტაბის შექმნაზე და აქაც პრობლემებია - რა უნდა აკეთოს, 31 მარტს აქცია უნდა დაგეგმოს? ეს არის სულ? საჭიროა კოორდინაცია და თუ ვინმეს დღეს კოორდინაცია შეუძლია, ყველაზე მისაღები ზურაბიშვილია, მაგრამ ისიც არ აქტიურობს.
რაღაც ქარტიას გამოაცხობენ ხოლმე და ესეც ნახევრად ნედლი დოკუმენტია, ახლა რაღაც ხუთპუნქტიანი გეგმა… ამაში იხარშება დღეს პროცესი. საჭიროა რაღაცის გაკეთება, ოღონდ კონკრეტულად, რა უნდა გააკეთოს პოლიტიკურმა სპექტრმა, ეს ცოტა რთული სათქმელია, ნელ-ნელა ერთმანეთთან მისასვლელი გზები უნდა მოძებნონ, ჯერჯერობით ამას ვერ ვხედავ.
მე არ ველოდები, რომ ხელისუფლება რაღაც დათმობებზე წავა, ჯერჯერობით არ წავა. თუ ჩვენ მართლა ვთვლით, რომ ძალიან კრიტიკული სიტუაციაა, უფრო აქტიური ფაზა უნდა დაიწყოს პროტესტის, მაგრამ გარღვევა იქნება მაშინ, როდესაც რუსთაველის გამზირიდან პროტესტი საზოგადოებაში გავა, ამისთვის საჭიროა კოორდინირებული მოქმედება.
თუ პოლიტიკურ სპექტრს უნდა, რომ იყოს წარმმართველი, მას რაღაცებზე უნდა ჰქონდეს ნაფიქრი, უნდა იმუშაონ ნეიტრალურ ამომრჩეველზე”, - განაცხადა ძაბირაძემ.
v-if="article.gallery" v-html="article.gallery"
