„ქართული ოცნების“ მხრიდან შეერთებულ შტატებთან ვერანაირი გადატვირთვა და ურთიერთობების განახლება ვერ მოხდება, - ამის შესახებ „ძლიერი საქართველოს“ ერთ-ერთმა ლიდერმა ანა ნაცვლიშვილმა განაცხადა, რითაც „ქართული ოცნების“ მხრიდან „რესპუბლიკელი“ სენატორის, ჯიმ რიშის კრიტიკას გამოეხმაურა.

როგორც ის განმარტავს, ამერიკის შეერთებული შტატების ახალი ადმინისტრაცია „ზუსტად ხედავს, ვინ - ვინ არის“.

„ვხედავთ, რომ ადამიანებს, რომელთაც არალეგიტიმური, რუსული „ოცნების“ წარმომადგენლები მუდმივ შეურაცხყოფას აყენებენ, მათზე წარმოუდგენელი ლექსიკით საუბრობენ, ეს ადამიანები არათუ რჩებიან ამერიკის შეერთებულ შტატებში მაღალ თანამდებობებზე, არამედ მათ აქვთ ურყევი მხარდაჭერა უკვე ახალი ადმინისტრაციის მხრიდანაც, ასეთი არის მათ შორის, ბატონი რიში. ეს კიდევ ერთხელ აჩვენებს იმას, რომ ვერანაირი გადატვირთვა და ურთიერთობების განახლება „ქართული ოცნების“ მხრიდან შეერთებულ შტატებთან ვერ მოხდება, რადგან მათთვის ძალიან კარგად არის გასაგები, რომ ირანის, ჩინეთის და რუსების მეგობრები იმავდროულად ვერ იქნებიან ამერიკის მეგობრები. ბატონი რიშის მიმართ გამოხატული მხარდაჭერა ბატონი ტრამპის და ახალი ადმინისტრაციის მხრიდან კიდევ ერთხელ იმის დადასტურებაა, რომ „ქართული ოცნებისგან“ განსხვავებით, ამერიკის შეერთებული შტატების ახალ ადმინისტრაციას ზუსტად აქვს დანახული, ვინ - ვინ არის“, - განაცხადა ნაცვლიშვილმა.