კოალიცია „ლელო - ძლიერი საქართველოს” ერთ-ერთი ლიდერი ლევან სამუშია „ნაციონალური მოძრაობის“ ხელისუფლების საქმიანობის შემსწავლელი საგამოძიებო კომისიის სხდომაზე კოალიციის ლიდერების, ბადრი ჯაფარიძისა და მამუკა ხაზარაძის დაბარებას „რუსულ ცირკად“ და „უნიჭო სპექტაკლად“ აფასებს.

როგორც სამუშიამ “პალიტრანიუსის” გადაცემა “360 გრადუსში” განაცხადა, ხაზარაძე და ჯაფარიძე თავად გასცემენ ამ საკითხთან დაკავშირებულ კითხვებს პასუხს.

“მორიგი რუსული ცირკი - ამით შეიძლება შეფასდეს. რა შუაშია მამუკა ხაზარაძე “ნაციონალური მოძრაობის” ხელისუფლებასთან, ან ბადრი ჯაფარიძე რა შუაშია. თუ ვინმეს რამე კითხვები ჰქონდა საერთოდ და რომ ყოფილიყო ამ კითხვების დასმის ელემენტარული საფუძველი, ვინმე როგორ ფიქრობს, რომ 2012 წლიდან 2025 წლამდე კითხვებს ვერ დასვამდნენ და არ დასვამდნენ? ეს არის მორიგი უნიჭო სპექტაკლი. პროკურატურა მათია, სასამართლო მათია, პოლიტიკურ გადაწყვეტილებებს ორცხობილებივით აცხობენ და რამე კითხვა რომ ყოფილიყო, რაღაც გამოგონილ სისულელე საქმეზე ადამიანებს ამდენი ხანი სასამართლოში დაატარებდნენ, იქ ვერაფერი ვერ დაუდასტურეს და ის საქმე ადამიანის უფლებათა ევროპულ სასამართლოშია და პრიორიტეტი აქვს მინიჭებული. ვისზე იბარებენ, ვის იბარებენ საერთოდ, “ნაციონალური მოძრაობის” ყოფილი წარმომადგენლებით გატენილი და გაძეძგილები არიან ესენი. შავაძის საქმის გამომძიებელი დღეს პარლამენტის წევრია - “რუსული ოცნების” წარმომადგენელია. კუდ-ის ერთ-ერთი მაღალჩინოსანი ბათუმის მერია - აქედან დაიწყონ, დაბარება თუ უნდათ.

გელათი თავზე გვენგრევა, სვეტიცხოველში წყალი ჩამოდის, გარეჯი საქართველოაო და კი, საქართველოა, მაგრამ ვინმემ ეს თემა საერთოდ წინ წამოწია? ამ ადამიანებს არც ეროვნული აინტერესებთ, არც ეროვნულობა აინტერესებთ, ესენი მოქმედებენ რუსული დავალებებით.

მამუკა ხაზარაძე და ბადრი ჯაფარიძე ყველა ამ საკითხს თვითონ გასცემენ პასუხს”, - განაცხადა სამუშიამ.