ირაკლი კუპრაძე - „ქართული ოცნების“ პირობებში საკადრო გადაადგილებას მნიშვნელობა არ აქვს - ერთადერთი, რატომაც შეიძლება საკადრო ცვლილებები ხორციელდებოდეს ისაა, ვინ უფრო უკეთ მოემსახურება ივანიშვილის მერკანტილურ ინტერესებს

ერთადერთი რამ, რატომაც შეიძლება საკადრო ცვლილებები ხორციელდებოდეს ისაა, თუ ვინ უფრო უკეთ მოემსახურება ივანიშვილის პერსონალურ მერკანტილურ ინტერესებს რაღაც კონკრეტულ მომენტში, - ამის შესახებ „ლელო-ძლიერი საქართველოს“ ერთ-ერთმა ლიდერმა, ირაკლი კუპრაძემ განაცხადა, რითაც მთავრობის საკადრო ცვლილებებს გამოეხმაურა.

კუპრაძის თქმითვე, „ქართული ოცნების“ პირობებში არანაირ საკადრო გადაადგილებას „მნიშვნელობა არ აქვს“.

„ქართული ოცნების“ პირობებში არანაირ საკადრო გადაადგილებას მნიშვნელობა არ აქვს მარტივი მიზეზის გამო - მთელი „ქართული ოცნება“, არალეგიტიმური ხელისუფლება, მთავრობა და ა.შ. ემორჩილება მხოლოდ ერთი კაცის ნებას და ეს არის ბიძინა ივანიშვილი და მისი რუსული მიზნები. ერთადერთი რამ, რატომაც შეიძლება საკადრო ცვლილებები ხორციელდებოდეს, ისაა თუ ვინ უფრო უკეთ მოემსახურება ივანიშვილის პერსონალურ მერკანტილურ ინტერესებს რაღაც კონკრეტულ მომენტში. „ქართული ოცნების“ პირობებში, საკადრო გადაწყვეტილებებისა და ცვლილებების ახსნა ეს არის“,- განაცხადა კუპრაძემ.

ცნობისთვის, გრიგოლ ლილუაშვილი სახელმწიფო უსაფრთხოების სამსახურის უფროსის თანამდებობას ტოვებს. რეგიონული განვითარების სამინისტრო დამოუკიდებელ სამინისტროდ ჩამოყალიბდება და გრიგოლ ლილუაშვილი რეგიონული განვითარების მინისტრის თანამდებობას დაიკავებს. სუს-ის უფროსის თანამდებობაზე ანრი ოხანაშვილია წარდგენილი, რომელიც იუსტიციის მინისტრის პოსტს იკავებდა. იუსტიციის მინისტრის პოსტზე კი ოხანაშვილს „ქართული ოცნების“ დეპუტატი პაატა სალია შეცვლის.