შავი ზღვის საერთაშორისო უნივერსიტეტის (IBSU) ინოვაციებისა და მეწარმეობის ცენტრის გუნდი საქართველოს განახლებადი ენერგიის განვითარების ასოციაციის (GREDA) რჩეული გახდა. ინფორმაციას შავი ზღვის საერთაშორისო უნივერსიტეტი ავრცელებს.

მათივე თქმით, IBSU-ს გუნდი საუნივერსიტეტო სტარტაპ კონკურსში - UNI4VERSE იღებდა მონაწილეობას, რომელიც საქართველოს ინოვაციებისა და ტექნოლოგიების სააგენტოს (GITA) ორგანიზებით ჩატარდა.

„კონკურსის ეტაპი შედგებოდა ორი ნაწილისგან:

პირველ ეტაპზე გუნდებმა გაიარეს უნივერსიტეტის შიდა ინტენსიური „მენტორშიფის“ პროგრამა, რის ფარგლებშიც, ინოვაციებისა და მეწარმეობის ცენტრის დახმარებით შეხვდნენ დარგის სპეციალისტებს და დაამუშავეს ინოვაციური სტარტაპ იდეები.

ფინალურ ეტაპზე გუნდებმა მონაწილეობა მიიღეს GITA-ს საკონსულტაციო შეხვედრებში, სადაც ინდუსტრიის წარმომადგენლებისა და ბიზნეს მენტორებისგან მიიღეს რეკომენდაციები, გაიღრმავეს ცოდნა და იდეები დემო დღისთვის მოამზადეს.

ეს წარმატება კიდევ ერთხელ უსვამს ხაზს, რომ შავი ზღვის საერთაშორისო უნივერსიტეტი აქტიურად უჭერს მხარს ინოვაციებს, მეწარმეობას და სტუდენტების განვითარების შესაძლებლობებს“, - ნათქვამია ინფორმაციაში.