საკადრო ცვლილებებს არავითარი გავლენა არ ექნება ჩვენი საზოგადოების, ჩვენი ქვეყნის უკეთეს მომავალზე, საერთაშორისო იზოლაციის დასრულებაზე და ევროპულ ინტეგრაციაზე, - ამის შესახებ „ნაციონალური მოძრაობის“ წევრმა, ლევან სანიკიძემ ჟურნალისტებს განუცხადა.

მან ისაუბრა მთავრობაში განხორციელებულ საკადრო ცვლილებებზე, მათ შორის სუს-ის უფროსის თანამდებობაზე გრიგოლ ლილუაშვილის ანრი ოხანაშვილით ჩანაცვლებაზე.

სანიკიძის თქმით, ეს ცვლილება ემსახურება „მხოლოდ ერთი კაცის ინტერესებს და მისი ოჯახის კეთილდღეობას“.

„ცვლილება არცერთ საკითხზე ის არ იმოქმედებს, არც რეპრესიული მანქანა გაჩერდება და არც პოლიტიკური დევნა. აქედან გამომდინარე, ეს არის ბიძინა ივანიშვილის კარზე მიმდინარე ბრძოლის შედეგები. რთულია იმის თქმა, თუ რით არის ეს გამოწვეული, ივანიშვილის სიმპათია-ანტიპათიებით, თუ შიდა კლანური დაპირისპირებით, მაგრამ მთავარი არის ის,რომ არსებითად არაფერი იცვლება არც პოლიტიკურ პარტიებისთვის, არც პოლიტპატიმრების ოჯახებისთვის, არც ქართული სახელმწიფოსთვის და არც საერთაშორისო იზოლაციის დასრულებისთვის.

[არსებული საკადრო ცვლილებით] ჩემია აზრით, არჩევანის გაკეთება არის ცუდსა და უარესს შორის. ქართულმა საზოგადოებამ უნდა გააკეთოს არჩევანი, რომელია ცუდი და რომელი უარესი. მიმაჩნია, რომ ძველი და ახალი კადრებიც კატასტროფაა, ემსახურებიან მხოლოდ ერთი კაცის ინტერესებს და მისი ოჯახის კეთილდღეობას“, -განაცხადა ლევან სანიკიძემ.