დღევანდელი დღე, ჩემი აზრით, უნდა ჩატარდეს მშვიდად და წყნარად. თითოეულ ქართველს, მიუხედავად ჩვენი პოლიტიკური კუთვნილებისა, გვაქვს ვალდებულება და პასუხისმგებლობა პირველ რიგში, აქ დაღუპული გმირების და მათი ხსოვნის წინაშე, რომ დღეს ამ დღემ მშვიდად, მათი პატივისცემით ჩაიაროს, - ამის შესახებ „გახარია საქართველოსთვის“ წევრმა, გიორგი შარაშიძემ პარლამენტთან მიმდინარე აქციაზე განაცხადა.

მისი თქმით, საქართველოს მოქალაქეებს 36 წლის შემდეგ კვლავ უწევთ ბრძოლა საქართველოს თავისუფლებისთვის და დამოუკიდებლობისთვის.

„9 აპრილი არის ყველაზე დიდი სიმბოლო საქართველოს დამოუკიდებლობისთვის ბრძოლის. 1989 წელს აქ იყო მსხვერპლი, მათ შორის ახალგაზრდების, ჩვენი თანამემამულეების და 2 წლის შემდეგ აქ დამოუკიდებლობა გამოცხადდა, რაც ნიშნავს იმას, რომ ეს თარიღი ერთი მხრივ არის მძიმე და მეორე მხრივ საზეიმო, რადგან საქართველოს დამოუკიდებლობის აღდგენას უკავშირდება. ამიტომ, დღევანდელი დღე, ჩემი აზრით, უნდა ჩატარდეს მშვიდად და წყნარად. თითოეულ ქართველს, მიუხედავად ჩვენი პოლიტიკური კუთვნილებისა, გვაქვს ვალდებულება და პასუხისმგებლობა პირველ რიგში, აქ დაღუპული გმირების და მათი ხსოვნის წინაშე, რომ დღეს ამ დღემ მშვიდად, მათი პატივისცემით და იმ სულისკვეთებით ჩაიაროს, რაც საქართველოს დამოუკიდებლობის შენარჩუნებას ნიშნავს. როგორც ჩანს, სამწუხაროდ, 36 წლის შემდეგ ჩვენ კვლავ გვიწევს ბრძოლა საქართველოს თავისუფლებისთვის და დამოუკიდებლობისთვის. ამიტომ, ქართველი ხალხის მოთხოვნა - ხელახალი არჩევნები, თავისუფალ და სამართლიან გარემოში და უკანონო პატიმრების გათავისუფლება - ძალაში უნდა დარჩეს და ჩვენ აქ მშვიდობიანი პროტესტი უნდა გავაგრძელოთ მანამ, სანამ ამ მოთხოვნას მივაღწევთ“, - განაცხადა შარაშიძემ.