„ქართულმა ოცნებამ“ საქართველოს და ქართველი ხალხის თავისუფლების და ერთიანობის დღეც კი, საზოგადოებასთან დასაპირისპირებლად და გასახლეჩად გამოიყენა- „ქართული ოცნება“ არ აპირებს უკან დახევას, ის შესულია ავტოკრატიულ სპირალში,- ასე ეხმაურება საგარეო საქმეთა ყოფილი მინისტრი, მიხეილ ჯანელიძე დღეს, 9 აპრილის მემორიალთან განვითარებულ მოვლენებს.

როგორც მიხეილ ჯანელიძე წერს, კრიტიკულად მნიშვნელოვანია პოლიტიკური კრიზისის განმუხტვა, რისთვისაც საზოგადოების მკაფიო მოთხოვნა არსებობს.

„ქართულმა ოცნებამ“, საქართველოს და ქართველი ხალხის თავისუფლების და ერთიანობის დღეც კი, საზოგადოებასთან დასაპირისპირებლად და გასახლეჩად გამოიყენა.

„ქართულმა ოცნებამ“, თავისუფლებისთვის მებრძოლი მოქალაქეები აგენტებად შერაცხა და საბჭოთა „კაგებესთან“ გაათანაბრა, ნაცვლად იმისა, რომ გაებედა და მათ დალაპარაკებოდა, მოესმინა და დღეს მაინც ეცადა, რომ საზოგადოების გასაერთიანებლად ნაბიჯი გადაედგა.

ყველაზე მძიმე და რთული ამ მდგომარეობაში არის ის, რომ „ქართული ოცნების“ არცერთმა წევრმა, თავისუფალი საზოგადოებისკენ გადასადგმელი ნაბიჯის სივრცე არ დაიტოვა.

ყველა კარგად ვხედავთ, რამდენად რთულია საერთაშორისო გარემო დღეს. შიდა გახლეჩილობა და პარტნიორებისგან იზოლაცია დამღუპველია ჩვენი თავისუფლებისთვის, იმ დიადი მიზნისთვის, რომელსაც შეეწირა საქართველოს მრავალი მოქალაქე 9 აპრილს და დამოუკიდებლობის აღდგენის შემდეგ, დღემდე.

კრიტიკულად მნიშვნელოვანია პოლიტიკური კრიზისის განმუხტვა. ამისთვის, არსებობს საზოგადოების მკაფიო მოთხოვნა: პოლიტპატიმრების გათავისუფლება და ახალი არჩევნების ჩატარება თავისუფალ გარემოში.

„ქართული ოცნება“ არ აპირებს უკან დახევას, ის შესულია ავტოკრატიულ სპირალში და ამ მდგომარეობიდან გამოყვანა მხოლოდ საზოგადოების ერთობას შეუძლია.

„ქართული ოცნების“ მომხრემ, თუ მოწინააღმდეგემ, უნდა გაიაზროს ის პასუხისმგებლობა, რაც თან ახლავს საზოგადოების გახლეჩას და მოსთხოვოს „ქართულ ოცნებას“ საზოგადოების მოთხოვნების შესრულება.

ჩვენ ერთი ოჯახი ვართ, რომელიც ოჯახის საერთო ინტერესებით უნდა იმართებოდეს და არა თვითმარქვია ოჯახის უფროსის მიერ ოჯახის წევრების გარიყვით“,- წერს მიხეილ ჯანელიძე „ფეისბუქზე“.

შეგახსენებთ, 9 აპრილის მემორიალთან საჯარო მოხელეების გამოჩენას ხმაური მოჰყვა. თბილისის საკრებულოს ფრაქცია „ქართული ოცნება - დემოკრატიული საქართველოს“ თავმჯდომარის მოადგილეს კონსტანტინე ზარნაძეს მოქალაქეებმა 9 აპრილის მემორიალთან მისვლის შესაძლებლობა არ მისცეს. ადგილზე მისვლის საშუალება ასევე არ მისცეს აფხაზეთის ავტონომიური რესპუბლიკის იძულებით გადაადგილებულ პირთა მინისტრ დავით ფაცაციას.