გრძელდება შანტაჟი და მუქარები, - ამის შესახებ თბილისის მერმა კახა კალაძემ დიდი ბრიტანეთის მიერ ოთხი ქართველი ოფიციალური პირისთვის სანქციების დაწესებასთან დაკავშირებით განაცხადა.

კალაძის თქმით, „ქართული ოცნება“ არავის აძლევს საშუალებას, რომ საქართველოზე იბატონონ, რის გამოც გაღიზიანებულები არიან.

„ჩვეულებრივად გრძელდება შანტაჟი და მუქარები. ამ ადამიანების დასანქცირება ბრიტანეთს მხრიდან შანტაჟის გაგრძელებაზე მიუთითებს. ჩვენ ვმოქმედებთ მარტივად – ვიცავთ საკუთარ ქვეყანას და საკუთარ ხალხს, არავის ვაძლევთ იმის საშუალებას, რომ იბატონონ ჩვენს ქვეყანაზე, გამოიყენონ საქართველოს ინტერესები სხვადასხვა დიდი ქვეყნის ინტერესების გასატარებლად და ამით ფეხქვეშ გაითელოს ჩვენი ქვეყნის ინტერესები. სწორედ, ამიტომ არიან გაღიზიანებულნი, თუმცა ვიდრე „ქართული ოცნება“ ხელისუფლებაშია, ყოველთვის დავიცავთ ქვეყნის დამოუკიდებლობას და განვამტკიცებთ საქართველოს სუვერენიტეტს“, - განაცხადა კახა კალაძემ.