ევროპის ინტერესებში არ შედის, რომ უსაფრთხოების სფეროში აშშ-ის მუდმივი ვასალი იყოს, - ამის შესახებ აშშ-ის ვიცე-პრეზიდენტმა, ჯეი დი ვენსმა UnHerd-თან ინტერვიუში განაცხადა.

„მე ევროპა მიყვარს. ევროპელი ხალხი მიყვარს. არაერთხელ მითქვამს, რომ ჩემი აზრით, შეუძლებელია ამერიკული კულტურის ევროპული კულტურისგან გამიჯვნა. ჩვენ ძირითადად იმ ფილოსოფიების, თეოლოგიებისა და, რა თქმა უნდა, მიგრაციული პროცესების პროდუქტი ვართ, რომლებიც ევროპიდან წამოვიდა და ამერიკის შეერთებული შტატები წარმოშვა“, - განაცხადა ჯეი დი ვენსმა.

მისი თქმით, ევროპელი ლიდერები იმიგრაციის, ინტეგრაციისა და უსაფრთხოების სფეროებში 21-ე საუკუნის გამოწვევებს ჯერ კიდევ ვერ უმკლავდებიან.

„ჩვენ ძალიან იმედგაცრუებულები ვართ, ვგულისხმობ, პრეზიდენტსა და მთლიანად ტრამპის ადმინისტრაციას, რომ ევროპელი ხალხი გონივრულ ეკონომიკურ და საიმიგრაციო პოლიტიკას ითხოვს, ხოლო ევროპელი ლიდერები მათ საპირისპიროს სთავაზობენ“, - აღნიშნა ვენსმა.

ვენსის განცხადებით, ევროპულ სახელმწიფოებს ისეთი შეიარაღებული ძალები არ ჰყავთ, რომელთაც სათანადო დაცვა შეუძლიათ.

„რეალობა ის არის, რომ მთელი ჩემი ცხოვრების განმავლობაში ევროპის უსაფრთხოების ინფრასტრუქტურა ამერიკის შეერთებული შტატების მიერ იყო სუბსიდირებული. ევროპელმა ლიდერებმა უსაფრთხოებაში არასაკმარისი ინვესტიცია ჩადეს და ეს უნდა შეიცვალოს. შარლ დე გოლს აშშ უყვარდა, მაგრამ ის მიხვდა და მეც ვაღიარებ, რომ ევროპის ინტერესებში არ შედის და არც აშშ-ის ინტერესებში შედის, რომ უსაფრთხოების სფეროში ევროპა აშშ-ის მუდმივი ვასალი იყოს. არ მგონია, რომ უფრო დამოუკიდებელი ევროპა აშშ-სთვის ცუდია. პირიქით, ეს აშშ-სთვის უკეთესია“, - განაცხადა აშშ-ის ვიცე-პრეზიდენტმა.