პოლიტიკოს გივი თარგამაძის განცხადებით, დროებით საგამოძიებო კომისიაზე გამოუცხადებლობის გამო სასამართლოს მიერ აღკვეთის ღონისძიების სახით მისთვის შეფარდებული 10 000 - ლარიანი გირაო არაპროპორციულია. აღნიშნულის შესახებ მან ჟურნალისტებს სასამართლო პროცესის დასრულების შემდგომ განუცხადა.

„პენსიის სახით, როგორც ყოფილი პარლამენტარის, შემოსავალი მაქვს 1000 ლარი. ქონება არ მაქვს საერთოდ, არ მერიცხება არაფერი. [გირაოს უზრუნველსაყოფად] ჩემი შვილის სახლზე იყო საუბარი, რომელშიც ცხოვრობს ჩემი სიდედრი, ამიტომ იმ სახლთან მე არანაირი კავშირი არ მაქვს.

შესაბამისად, რაც არის ეგ არის, რას ვიზამთ. რაც შეეხება გირაოს გადახდას, ადვოკატთან შევთანხმდები", - განაცხადა გივი თარგამაძემ.

რაც შეეხება პროკურატურის პოზიციას, რომ შესაძლოა გივი თარგამაძე მიიმალოს, თარგამაძე განმარტავს, რომ მისი მხრიდან არანაირი მიმალვის საფრთხე არ არსებობდა. მისი თქმით, თავად დროებითი საგამოძიებო კომისიის მუშაობა კი, ოპოზიციასთან ბრძოლას ემსახურება. ამასთან, მან ჟურნალისტებთან განმარტება გააკეთა წლების წინ მის მიერ გაკეთებულ ცნობილ განცხადებაზე, როდესაც გამოიყენა წინადადება „სულს ამოგხდით”.

„აი, მაგას ხომ ვერ გავცდით კიდევ, რამდენი ხანია. 2012 წელს, რაც მოვიდნენ, იმის მერე ხან ჩემ წაღებულ 80 მილიონს ეძებდნენ და აღმოჩნდა, რომ არ ყოფილა. მერე სხვა რაღაცებიც შემოეცალათ და დარჩათ ეს „სულს ამოგხდით”, რომელზეც ძალიან ხშირად განვმარტე, რასაც ვამბობდი. ვფიქრობ, დღესდღეობით ყველაზე ლეგიტიმურია სწორედ ეგ ნათქვამი, იმიტომ, რომ იქ ლაპარაკი იყო იმაზე, რომ “რუსული დროშები არ იფრიალებს რუსთაველზე და ჩვენ ამის უფლებას არ მივცემთ”. მგონი, ახლა ვხედავთ, როგორ აპირებენ ამ რუსული დროშების მოფენას”, - განაცხადა თარგამაძემ.