თბილისის საქალაქო სასამართლოში „კოალიცია ცვლილებისთვის“ წევრის, პოლიციელ მირიან ქავთარაძეზე თავდასხმაში ბრალდებულ საბა სხვიტარიძის სასამართლო პროცესი გაიმართება.

სხდომა სასამართლოში 15:00 საათზე დანიშნული, სადაც, სავარაუდოდ, საქმის გამომძიებელი, სალომე ედიშერაშვილი დაიკითხება. აღნიშნულ ინფორმაციას სოციალურ ქსელში საბა სხვიტარიძის ძმა, თორნიკე სხვიტარიძე აქვეყნებს.

„ბოლო მონა რჩება გამოსაკითხი, ის ვითომ “გამომძიებელი”, ვის კაბინეტშიც ჩემი ძმა სცემეს, აწამეს და მაინც ვერ გატეხეს. ამ ქალმა ყველაფერი იცოდა. ჩუმად იყო, ხელი შეუწყო, მონაწილეობდა! ისიც აგებს პასუხს! როგორც ყველა დანარჩენი!“, - წერს სხვიტარიძე.

ცნობისთვის, საბა სხვიტარიძეს ბრალდება სისხლის სამართლის კოდექსის 353-ე პრიმა მუხლის მეორე ნაწილით აქვს წარდგენილი, რაც პოლიციელის ჯანმრთელობის ხელყოფას სამსახურებრივ საქმიანობასთან დაკავშირებით გულისხმობს.

სახელმწიფო ბრალდების განმარტებით, სხვიტარიძის ქმედების შედეგად სამართალდამცავმა, თბილისის მთავარი სამმართველოს ერთ-ერთი სამმართველოს უფროსმა, მირიან ქავთარაძემ ფიზიკური დაზიანება მიიღო, კერძოდ კი, მას თავი ჰქონდა გატეხილი.

აღნიშნული ქმედება სასჯელის სახედ და ზომად 7-დან 11 წლამდე თავისუფლების აღკვეთას ითვალისწინებს.

ამასთან, საქმეში დაზარალებულის სტატუსი აქვს საბა სხვიტარიძეს. ის სამართალდამცავების მხრიდან დაკავების შემდეგ ფიზიკური და ფსიქოლოგიური ძალადობის რამდენიმე ეტაპზე საუბრობს.