ქრისტე აღსდგა, არც ერთი ნაბიჯი უკან! ბოლომდე! - ეს სიტყვები სასამართლოს სხდომათა დარბაზში შემოსვლისას ნარკოდანაშაულში ბრალდებულმა ჟურნალისტმა ნიკუშა კაციამ განაცხადა.

ამ წუთებში სხდომაზე, რომელიც თბილისის საქალაქო სასამართლოში მიმდინარეობს, ორ მოწმეს დაკითხავენ. მათგან ერთი გამომძიებელია, მეორე კი ქიმიური ექსპერტი, რომელმაც ნარკოტიკული საშუალების სახეობა და ოდენობა განსაზღვრა.

ცნობისთვის, ნიკუშა კაციას ბრალი სისხლის სამართლის კოდექსის 260-ე მუხლის მე-6 ნაწილით წარედგინა, რაც დიდი ოდენობით ნარკოტიკული საშუალებების უკანანო შეძენა-შენახვას გულისხმობს.

უფრო კონკრეტულად, კაციას 14 გრამ კოკაინის ქონას ედავებიან. ის წარდგენილ ბრალდებას არ აღიარებს და დაკავებას მიმდინარე საპროტესტო აქციებზე მის აქტიურ მონაწილეობას უკავშირებს.

აღნიშნული დანაშაული 8-დან 20-წლამდე ან უვადო თავისუფლების აღკვეთას ითვალისწინებს.

ნიკუშა კაცია 7 დეკემბერს დააკავეს.